Gĭt nđờ jơ̆t nă cau bơsram dờng dong kờl is tàm càr mờ bơdìh càr Dăk Lăk, gam tus bal jơh nùs tàm ală broă lơh gàr tơl niam rài kis mpồl bơtiàn tàm tiah nhàr lơgar Ea Rốk mờ Ia Lốp, càr Dăk Lăk, mơkung lơh uă broă lơh bơt bơtàu, bơnah broă geh kwơ tàm ƀòn lơgar. Mpồl 45 nă cau bơsram dờng dong kờl is bơh Hìu bơsram Đại họk Nam Cần Thơ neh pơgồp bal mờ đoàn viên, ơruh pơnu tàm ƀòn lơgar lơh uă broă lơh geh kwơ, bè: jàu sră măi mờ phan ngui bơsram sră ai kơnòm bơsram kấp 1, bơt bơtàu tiah nhơl ñiŏ mờ lam lơh pơrjum kàl rơlô bơkang ai kơnòm dềt, pà loa kéo ai ală hìu niam chài in.

Bơdìh hơ̆, gĭt nđờ rơhiang nơm bồng bi Dà lơgar geh jàu tàm tê làng bol, gĭt nđờ rơbô jơlŭ bung mi duh hồl geh ai ală kơnòm dềt mờ cau kra dồ nă să in. Dờp phan pà mờ phan ngui bơsram sră ai kòn klau  rcang mut bơsram ơdŭ 4 in, mò Huỳnh Thị Cẩm Tú, ơm tàm thôn Dự, sàh Ia Lốp, càr Dăk lăk, ngoh rơngăc đơs: “Tàm do là tiah sar lơgar ngài den geh dờp ală phan pà bè do chờ hờp ngan, ală sau dềt kung kờñ ngan sơl, chờ hờp ngan mờ ngoh rơngăc ngan. Ưn ngài uă ngan ală bơyô cau bơsram dờng tài bơh tiah ngài tus tàm do ai ală sau in ală bơnah phan pà geh kwơ ngan”.

Ờ mìng cèng wơl ală phan pà bè phan bơna lơm, mpồl dong kờl is gam lam lơh mblàng yal adat boh lam bè rcang lài kơryan bĭc bài, ma túy mờ rềs às tăc bro kòn bơnus; pơgồp bơnah tơnguh uă bơta gĭt wă; bơta chài sền gàr is să tờm ai làng bol tiah nhàr lơgar in. Kờp jơh priă jền ală broă lơh dê rlau 300 tơlak đong. Cau bơsram dờng Mai Huỳnh Đặng, cau tàm mpồl dong kờl is pà gĭt, dùl poh dong kờl is ờ gŏ jŏ ờ, mơya lời wơl ală tềl lời wơl ờ tŭ lơi hŭi ờ mìng mờ làng bol tiah nhàr lơgar lơm mờ jơh bal tơl nă cau bơsram dờng dê sơl:“Rlau mờ ală bơta lơi mờ oh kơ̆p gơn mờ neh rcang lài hơ̆ rao. Tài bơh oh kung neh geh mờng chài tàm lơh broă lơh Kàl rơlô bơkang tàm Tây Nguyên rao mơya dơ̆ do geh uă bơta ngoh rngăc rlau. Tơnơ̆ broă lơh do den oh geh tai ală mờng chài pa, jơnau bơsram pa ai ală dơ̆ dong kờl is pơn jat tai, dong oh bơtơl ai să tờm in uă rlau tai bè ală broă lơh dong kờl mpồl bơtiàn”.

Tàm sàh Hòa Phú, càr Dăk Lăk, rlau 500 nă kwang bàng, cau ling Trung đoàn 584 (Ƀộ đơng lam Ling klàng càr Dăk Lăk) bal mờ uă đoàn viên, ơruh pơnu ƀòn lơgar pa ai cau lik lòt lơh broă lơh kàl rơlô bơkang nam 2025 jat broă rơndăp lơh bơh Ƀộ đơng lam Ling klàng càr mờ Anih duh broă Mặt trận Dà lơgar Việt Nam càr dê. Tàm broă lơh jŏ jòng 45 ngai, kwang bàng, cau ling mờ đoàn viên ală sàh Hòa Phú, Ea Kiết mờ sơnah ƀòn Tân Lập, càr Dăk Lăk tus bal lơh niam wơl gùng lòt rê ƀòn lơgar, tam tờm chi, lơh broă lơh bơt bơtàu tam klăc ling klàng – làng bol, hìu ơm ai hìu bơnhă geh sră dong kờl Dà lơgar, toah wàs niam wơl ù tiah ƀòn lơgar lòt ală thôn, sàh- sơnah ƀòn mờ dong kờl làng bol tam gơl sồ, lơh sră pơ àr gơnoar atbồ tàm tơngai tơmŭt bal. Tus bal broă lơh tàm ƀùi drim tàm sàh Hòa Phú, Đại úy Phan Thanh Tài, Tiểu đoàn 303 - Trung đoàn 584 (Gah đơng lam Ling klàng càr Dăk Lăk) pà gĭt, broă lơh sơnđờm bơh tŭ do tus jơh ngai 30 nhai 8, kờp dŭ rơ̆p lơh niam wơl 150 nơm hìu ơm dong kờl hìu bơnhă geh sră dong kờl Dà lơgar, lơh niam wơl rlau 90 kơi sồ gùng lòt tàm ală thôn, tam gĭt nđờ rơbô nơm tờm chi tàm ală sàh pa: “Dơ̆ 1 nam 2025, bol añ hòi jà rlau 200 nă kwang bàng, cau ling nàng lơh ală bơnah broă tàm 2 sàh mờ 1 sơnah ƀòn, tơrgùm toah wàs rƀòng dà, pơs wàs sàng goh anih lơh broă Dà lơgar, dong kờl ală hìu bơnhă geh sră dong kờl Dà lơgar mờ uă broă lơh geh ngan... Bơh hơ̆, pơgồp bơnah bơt bơtàu bơta tam klăc dờng ling klàng- làng bol, lơh geh ală bơta kơ̆ kơnhăp nàng bol añ in lơh sir kơnòl broă gàr niam lơngăp lơngai, sền gàr Dà lơgar”.

 Tus bal broă lơh dơ̆ do, tàm sàh Hoà Phú, càr Dăk Lăk, đoàn viên, ơruh pơnu ƀòn lơgar kung jơh nùs lơh ală bơnah broă bè pơs wàs tiah ơm kis, dong kờl làng bol tam gơl sồ, bơto pơlam sră pơ àr gơnoar atbồ điện tử. Bi Lê Dương Bá Ước, Phó Củ tịc Anih duh broă Mặt trận Dà lơgar Việt Nam sàh Hoà Phú, drơng broă Đoàn sàh dê, pà gĭt: Bulah tiah do pa tơmŭt bal, mpồl broă uă ngan, mơya mpồl đoàn viên, ơruh pơnu sùm lam lài, lòt bal mờ mpồl ling tàm broă lơh hòi jà làng bol mờ bơt bơtàu ƀòn lơgar pa. Bi Lê Dương Bá Ước, pà gĭt: "Đoàn sàh pơgồp bal mờ Trung đoàn 584 dong kờl ngai lơh broă dong làng bol tơnhào kòi, kơphê mờ tiêu tàm kàl tơnhào. Bơdìh hơ̆, bol añ gam lam lơh ală broă lơh, bơnah broă ơruh pơnu, pơn rơ ngan là broă lơh thùng sồ siă ờ khih aniai tàm thôn 8, sàh Hoà Khánh (lài do dê).

Ală bơnah broă geh ngan, ngan ngồn tàm broă lơh dong kờl is kàl rơlô bơkang nam 2025 tàm Dăk Lăk ờ mìng tơngŏ nùs nhơm geh kơnòl, nùs nhơm jơh nùs bơh rơnàng kơnòm să dê lơm mờ gam pơgồp bơnah jơh nùs tam gơl niam rài kis làng bol tiah nhàr lơgar, tiah sar lơgar ngài. Bơh ală bơnah phan pà dềt rơ hền, ală broă lơh bơt bơtàu mpồl bơtiàn tus broă lơh hòi jà làng bol jrô ơnàng làm uă, jơh ală bơta neh lơh gơ rề uă jơnau yal tơngĭt nùs nhơm niam, đềt mềr tam klăc bal đah cau bơsram dờng, cau ling mờ làng bol.