Ală ngai bồ nam pa Ất Tỵ, hìu măi bơh Kông ty TNHH Mai phan Able Joy mờ 4 rơbô 500 nă cau mai tàm tiah lơh sa mờ măi mok Hoà Phú, càr Dăk Lăk neh lơh broă jơh bơta pràn. Ồng Trần Trí Vĩ, Kwang Lam bồ Kông ty pà git, mpồl lơh sa kă bro kờp dŭ rơwah tai 1 rơbô nă cau măi phan nàng lơh tơl 7 tơlăk phan neh cih măt mờ ală mpồl lơh broă: “Tus tŭ do den pang sră tăc phan bơh Kông ty tàm nam 2025 neh tơl jơh. Kung kơ̆p kờñ càr Dăk Lăk gam anih tai nàng pờ ơnàng tai nàng bơtàu tơnguh. Sền gŏ càr Dăk Lăk bè bơta niam mờ kòn bơnus geh uă ngan”.

Dùl bơta tơngŏ niam ndai là càr Dăk Lăk neh tăc geh cồng nha bă ù hìu sơnơm lài do tềng anih sồ 02 gùng Mai Hắc Đế geh 568 tơmàn đong. Bă ù do rơ̆ geh bơtàu tơnguh gơs dùl tiah kă bro mờ tiah lơh hìu ơm dờng niam, mờ khà priă tă lơh tàm nam 2025 kờp dŭ tus 1 rơbô 300 tơmàn đong. Do ờ mìng là dơ̆ niam nàng lơh pràn gơguh priă tă tàm kes priă mờ gam dong kờl tơnguh phan bơna bal mờ bơta niam rài kis tàm ƀòn dờng Buôn Ma Thuột. Ồng Bùi Văn Yên, Kwang Lam bồ Sờh Priă jền càr Dăk Lăk đơs: “Sơn đờm geh khà priă do là chờ hờp ngan, ai geh bơnàng jă nàng he lơh jăt broă tă tàm kes priă, tàm hơ̆ uă ngan là tă priă ù nam 2025 do. Bơta kwơ màng cau bơcri priă là dùl mpồl lơh sa kă bro pràn, gam mhar lơh rơndăp broă lơh do. Kờp dŭ tàm 3 nam Rơndăp broă lơh do geh lơh gơs, tàm hơ̆ uă ngan tàm nam do, khà priă bơcri uă ngan, priă do pơgồp bal tàm broă lơh gơguh lơh sa càr Dăk Lăk dê”.

Bŭ lah geh ală bơta tơngŏ niam, mơya nàng lơh geh jơnau kờñ gơguh lơh sa 8%, càr Dăk Lăk pal mhar bơsong ală bơta “gơkòl” tàm broă atbồ. Lài ngan là lơh niam wơl broă rơndăp lơh, broă ngui ù, mhar lơh jăt broă rơndăp lơh càr neh kĭ; bơsong ală bơta gơkòl gơrềng tus broă atbồ, ngui ù geh anih tờm bơh ală anih lơh sa suơn sre brê bơnơm dờng. Bal mờ hơ̆ là lơh mhar broă bơcri priă dà lơgar. Jăt ồng Nguyễn Hoài Dương, Kwang lam bồ Sờh Broă lơh sa suơn sre mờ Bơtàu tơnguh ƀòn lơgar càr Dăk Lăk đơs, càr pal mhar lơh niam wơl ală sră nggal: “Bơta hòi jà bơcri priă, añ gŏ là pal geh lơh, tŭ do he pal lơh mùl màl, geh bal tàm gah lơh sa suơn sre, gah lơh phan den he sơrbì ờ sền gròi uă ngan bơta niam bơh ală cau bơcri priă neh tus tàm do. Ală cau do ndrờm đơs broă lơh sră nggal càr Dăk Lăk kal ke ir. He pal sền wơl mơ mờ pal ai loh ờ mìng Sờh Rơndăp broă mờ gam geh kơnòl ală sờh, gah lơh broă bal mờ ală tiah ndai pal lơh broă lơi nàng hòi jà geh bơcri priă”.

Ồng Phạm Ngọc Nghị, Củ tịc Anih duh broă Làng bol càr Dăk Lăk pà git, nàng lơh geh jơnau kờñ gơguh lơh sa 8%, càr pal lơh ală broă lơh ndrờm bal mờ lơh pràn. Lài jơh, lơh niam wơl sră nggal là broă lơh lài ngan. Bơtàu tơnguh phan bơna là bơta tờm. Bơdìh hơ̆ tai, lơh pràn bơcri priă jăt broă lơh dà lơgar bal mờ làng bol lơh bal (PPP) là dùl broă lơh kwơ màng, hòi jà geh bơta pràn bơh cau dùl nă să dê, tơrgùm ƀà bơta kal ke tus mờ kes priă dà lơgar, mờ lơh geh uă bơta niam geh broă lơh mờ bơtàu tơnguh phan bơna.

Bal mờ hơ̆, càr rơ̆p lơh pràn bơtàu tơnguh gah lơh gơs phan bơh broă lơh sa suơn sre, lơh sa mờ măi mok dong kờl, nàng lơh gơguh bơta kwơ ai gah lơh sa suơn sre in, lơh geh bơta pràn gơguh lơh sa kơl jăp. Mờ bơtàu tơnguh ală gah broă drơng ala bè lòt nhơl, priă jền… nàng lơh geh uă gah lơh sa. Ồng Phạm Ngọc Nghị đơs: “Tơrgùm đơng lam ndrờm bal broă tă mờ ngui dơ̆ kes priă, rơcang lài, ndrờm bal di tŭ lơh geh cồng nha nàng ală broă lơh ndrờm bal dờng bơh gah lơh sa dê. Lơh mhar broă bơcri priă dà lơgar mờ lơh geh cồng nha 3 broă lơh jơnau kờñ dà lơgar dê; lơh ngan lơh glài nền nòn ală broă lơh ờ niam tàm broă bơcri priă dà lơgar. Di tŭ bơsong kal ke ai mpồl lơh sa kă bro bơcri priă in; tơrgùm bơcri priă lơh phan bơna tàm tiah lơh sa mờ măi mok càr dê, nàng hòi jà ală cau bơcri priă tàm lơgar mờ lơgar bơdìh tus”.

Mờ broă lơh ngan pràn kơl dang mờ dùl nùs ring bal bơh gơnoar atbồ bal mờ mpồl bơtiàn mpồl lơh sa kă bro, càr Dăk Lăk geh lơh gơs jơnau kờñ gơguh lơh sa 8% tàm nam 2025. Bơta kwơ màng rơlao là bơta do rơ̆p lơh geh bơnàng jă ai broă bơtàu tơnguh pràn kơl dang tàm tơngai tus, nàng càr Dăk Lăk mùl màl di pal mờ tiah tờm lơh sa pràn kơl dang ngan Tây Nguyên dê.