Mho òr (09/02), Thủ tướng Cíñ phủ ồng Phạm Minh Chính lơh broă mờ đơng lam bồ tờm càr Quảng Ngãi nàng sền wơl cồng nha lơh jăt kơnòl broă bơtàu tơnguh lơh sa mpồl bơtiàn nam 2024 mờ cri bơyai gùng dà broă lơh, kơnòl broă nam 2025, ai geh bơta niam nàng càr Quảng Ngãi bơtàu tơnguh pràn, lơh gơs uă ngan ală jơnau kờñ geh ai tus jơh tơngai lơh broă bơh nam 2020 tus 2025.

Đơs tàm dơ̆ lơh broă, Thủ tướng ồng Phạm Minh Chính neh sơnio loh 8 kơnòl, broă lơh tờm tàm hơ̆ đơs tờm: Lơh jăt Jơnau lơh nền sồ 18 bơh Dà lơgar bè rơndăp săp sèng mpồl kwang bàng lơh broă di pal, lơh broă pràn geh cồng nha, bal mờ hơ̆ rơcang kwang bàng di pal, di mờ bơyai lơh Pơrjum dờng ală kấp, pal lơh gơs tàm nhai 2 nàng nhai 3 lơh broă; Tơrgùm lơh jăt Jơnau lơh nền sồ 57 lơh pràn broă ngui măi mok sồ, pơgồp bal mờ broă tam gơl sồ mờ lơh jăt Ală jơnau neh nền sồ 06. Tơrgùm bơ̆t bơtàu Đảng kloh niam pràn kơl dang, mpồl anih lơh broă sră nggal tam klăc bal, ring bal, niam, lơh tờm, lơh broă, geh cồng nha; bơyai lơh niam Pơrjum dờng Đảng ală kấp, wèt tus Pơrjum dờng Đảng dơ̆ XIV.