Tàm dơ̆ tìp mat kấp dờng, Củ tịc Hạ viện Ba Lan ồng Szymon Holownia jờng rơ uă ngan dơ̆ lòt còp mờ Thủ tướng Cíñ phủ ồng Phạm Minh Chính dê, sền do là tềl lời wơl kwơ màng tàm bơta gĭt gơ̆p đah Việt Nam mờ Ba Lan tàm tơngai nam do 2 lơgar tơngkah kir sơnrai 75 nam lơh bơta gĭt gơ̆p Cribơyai broă mờ lơgar ndai (1950-2025). Thủ tướng Cíñ phủ ồng Phạm Minh Chính ưn ngài bơta wă rò jơh nùs ngan mờ ram mhŭ ngan mờ Củ tịc Hạ viện Ba Lan bal mờ ală Hạ nghị sỹ lời ai Mpồl kwang bàng kấp dờng lơgar Việt Nam in; đơs nền jơnau kờñ dơ̆ lòt còp nàng kờñ sơlơ tơnguh ta pràn ngan bơta gĭt gơ̆p lơh bơyô ờs mờng mờ lơh broă bal uă bơta niam bơnĕ đah 2 lơgar dê tàm jơh ală gah, mơkung sơlơ lơh kơ̆ rlau tai bơta lơh bơyô bal đah 2 jơi bơtiàn Việt Nam mờ Ba Lan. Đơs sùm bơta kwơ màng bơh bơta tờm lơh broă bal kă bro phan- bơcri priă tàm bơta gĭt gơ̆p 2 lơgar dê, Thủ tướng Cíñ phủ ồng Phạm Minh Chính mờ Củ tịc Hạ viện lơgar Ba Lan ring bal lơh pràn lơh broă bal tàm gah tờm do ndrờm pal mờ bơta gĭt gơ̆p cíñ trị mờ niam chài niam bơnĕ đah 2 lơgar dê mờ ring bal pơn đơl pràn lơh ngan tơnguh priă lơh geh bơh kă bro phan 2 lơgar dê gơguh 5 tơmàn dolar Mỹ.

Dồ ngai bal, Thủ tướng ồng Phạm Minh neh wă Cau lam bồ ală mpồl lơh sa kă bro lam lài lơgar Ba Lan dê, geh: Tập đoàn Adamed mờ gah rơndeh par LOT Airlines, sơlơ tơnguh tai lơh broă bal lơh sa mờ bơcri priă đah 2 lơgar dê.

Lài hơ̆, drim ngai 17/01 jăt jiơ tiah do dê, Thủ tướng ồng Phạm Minh Chính tus còp mờ geh jơnau cih đơs gùng dà broă lơh kwơmàng tàm Đại họk Tơrgùm bal Warsaw, lơgar Ba Lan dê. Jơnau cih đơs bal mờ tơngume: “Ai gĭt gơ̆p Việt Nam mờ Ba Lan wèt tus broă dờng rlau tai, tài ring lơngai mờ bơtàu tơngguh bơh 2 kơnhoàl ù tiah đah jum măt tơngai lik câu Á mờ tiah tàm gùl đah măt tơngai lik câu Âu dê”. Hìu bơsram Đại họk Tơrgùm bal Warsaw là rùp pơrya ai bơta lơh broă bal kơ̆ kơl jăp đah Việt Nam mờ Ba Lan tàm broă bơto bơtê. Gĭt nđờ rhiang nă cau bơsram dờng mờ kwang bàng Việt Nam neh mờ gam bơsram tàm Hìu bơsram do. Uă cau ngai do là ală cau pơgru dờng, cau jak chài khà dùl tàm uă broă.

 Đơs bè bơta wèt sền bè gĭt gơ̆p đah Việt Nam mờ Ba Lan, Thủ tướng đơs nền, Việt Nam sền gròi ngan mờ kơ̆p kờñ chồl tơngguh, lơh jrô ơnàng rlau tai gĭt gơ̆p lơh broă bal tơl làm mờ ală lơgar tiah tàm gùl đah măt tơngai lik câu Âu dê, is ồn là mờ ală lơgar gơ̆p bơyô ờs mờng bơh yau bè Ba Lan. Thủ tướng yal bè 6 tam gơl pràn nàng ai gĭt gơ̆p đah Việt Nam mờ Ba Lan gơguh tus broă dờng rlau tai.