Thủ tướng đơs nền Việt Nam sùm sền dờng màng mờ kơ̆p kờñ tơnguh bơta gĭt gơ̆p mờ ală lơgar bơyô ờs mờng tàm tiah tàm gùl đah mat tơngai lik câu Âu dê, tàm hơ̆ Ba Lan là dùl tàm ală lơgar lơh broă ai lài ngan. Tàm dơ̆ tìp mat kấp dờng, 2 nă kwang đơng lam bồ tơngŏ bơta chờ hờp bè ală broă lơh bơtàu tơnguh jơh nùs bơh bơta gĭt gơ̆p đah Việt Nam mờ Ba Lan tàm uă gah. Lơh sa- kă bro phan neh gơ gơs bơta tờm kwơ màng tàm lơh broă bal đah 2 gah mờ priă lơh geh bơh tăc phan mờ lơgar do dê 2 gah bơh nam 2020 tus tŭ do ndrờm lơh geh rlau 2 tơmàn 500 tơlak dolar Mỹ, mìng is nam 2024 lơh geh rlau 3 tơmàn dolar Mỹ, ai Ba Lan gơ gơs cau lơh broă bal kă bro phan dờng ngan rlau jơh bơh lơgar Việt Nam tàm tiah tàm gùl đah mat tơngai lik câu Âu dê.

Kwang đơng lam bồ 2 lơgar kung cribơyai bè gùng dà pơlam mờ ală broă lơh kwơ màng nàng kờñ ai bơta gĭt gơ̆p 2 lơgar dê ngai sơlơ geh lơh jrô ơnàng làm uă, geh cồng nha, gờñ tơnguh gơnoar bơta gĭt gơ̆p Việt Nam mờ Ba Lan gơguh tus gơnoar lơh broă kwơ màng.