Tus bal geh Kwang atbồ lơgar Timor Leste ồng Hô-sê Ma-nuel Ra-mos Hô-ta, kwang đơng lam bồ ală lơgar tàm mpồl ASEAN, ală mpồl lơh broă tus bơh ală lơgar. Cri bơyai rài Tơnơ̆ do mpồl ASEAN nam 2025 mờ tơngu me “Bơ̆t bơtàu mpồl ASEAN tam klăc, tơrgùm bal, mờ kơnờm tàm bơta pràn is tàm dùl dunia tam gơl” nàng tam pà bal ală jơnau kơlôi mờ kơ̆p kờñ bè tơnơ̆ do bơh Mpồl bơtiàn ASEAN dê.

Đơs tàm cri bơyai, Thủ tướng ồng Phạm Minh Chính đơs sùm, dunia mờ tàm tiah câu Á -–Thái Bình Dương gam sền gŏ ală tam gơl uă ngan mờ ală bơta lòng bal mờ tŭ niam tàm bơrlŭ bal. Ală bơta gơcèng bơta gùt plai ù, gùt làng bol, tơl ală bơta gơlik geh mhar rơlao, kal ke rơlao, kal ke git lài rơlao mờ lài. Thủ tướng ồng Phạm Minh Chính đơs loh, mŭt tàm tơngai bơtàu tơnguh pa, mpồl ASEAN geh đơs lài rơ̆p gơs rài lơh sa dờng dơ̆ pe dunia dê mờ GDP sơrlèt rơlao 10 rơbô tơmàn dolar Mỹ, geh drà ngui sa rơlao 800 tơlăk nă làng bol; mờ kung rơ̆p là tiah tờm măi mok, lơh sa sồ mờ tam gơl pa bơceh lơh, mờ rài lơh sa sồ digơlan geh 1 rơbô tơmàn dolar Mỹ tàm nam 2030.