Đơs tàm dơ̆ tìp măt, pà phan ală Mpồl cau jòi rồ, tơrgùm ƀồc ntìng cau ling chơ̆t màng Ling tiah 9, Thủ tướng ồng Phạm Minh Chính đơs nền Đảng, Dà lơgar rơ̆p pơn jăt tai lơh jơh pràn, hòi jà jơh mpồl lơh broă cíñ trị bal mờ gùt mpồl bơtiàn nàng lơh geh cồng nha rơlao tai broă jòi rồ, tơrgùm mờ git đal ƀồc cau ling chơ̆t màng, nàng “ờ geh dùl nă cau ling lơi gơtìp huĭ, ờ geh dùl hìu nhă cau ling chơ̆t màng lơi pal kơ̆p gơn tàm bơta moăt”.

Thủ tướng kơ̆p kờñ mờ pin dờn mờ bơhiàn niam chài kòn bơnus uă, jơnau niam “hùc dà kah tô dà”, “sa plai kah cau tam chi”, mờ broă lơh ngan uă bal mờ jơnau kờñ bal bơh gùt Đảng, gùt làng bol, gùt ling klàng, tàm tơngai tus, mpồl jòi rồ, tơrgùm ƀồc ntìng cau ling chơ̆t màng pơn jăt tai tơnguh nùs nhơm geh kơnòl bal mờ ală broă lơh mờng chài neh geh, lơh ngan sơrlèt mờ ală kal ke, tơrlòng nàng lơh gơs jăk chài kơnòl broă geh jào; pơgồp bal tàm broă lơh tơrmù bơta moăt rài tam lơh, lơh gơs kơnòl broă gơwèt mờ ală cau neh phi să tài bơta lơngăp lơngai, krơi is, tơrgùm dùl Dà lơgar.