Pơrjum kwang bàng kâp dờng BRICS nam 2025 mut lơh drim ngai 06/7 (jat jơ tiah do) tàm ƀòn dờng Rio De Janeiro, lơgar Brazil. Do là dơ̆ sơn rờp, Việt Nam tus bal pơrjum mờ gơnoar là lơgar lơh broă bal tàm Pơrjum kwang bàng kâp dờng BRICS, dùl mpồl lơh broă bal uă lơgar đah ală rài lơh sa pa pơn rơ mờ ngai sơlơ geh bơta gơ rềng dờng ngan jơh bal bè lơh sa mờ cíñ trị.

Pơrjum kwang bàng kâp dờng BRICS nam 2025 geh tơngume “Sơlơ tơnguh tai lơh broă bal tiah đah jum nàng kờñ chồl tơnguh bơta đơng lam bồ gơ glòm jơh mờ kơ̆ kơljap rlau”, là dùl tàm ală broă uă lơgar kuơmàng, geh bơta tus bal bơh mờr 20 nă kwang đơng lam bồ kâp dờng ală lơgar, Kwang Gơnoar cih dờng Liên hợp quôk mờ kwang đơng lam bồ uă mpồl lơh broă ală lơgar. Thủ tướng ồng Phạm Minh Chính tus bal mờ geh jơnau đơs tàm dar cribơyai kâp dờng bè tơngume: Sơlơ tơnguh tai rài lơh broă uă lơgar, ală bơta lơh sa, priă jền mờ bồ tơngoh jak kòn bơnus lơh gơs; Tiah ơm kis, COP 30 mờ lơh sơnơm gùt plai ù mờ tus bal yal Jơnau yal bơr pal jat bơh ală kwang đơng lam bồ bè priă jền trồ tiah mờ sơn đờm lam lơh mpồl lơh broă bal BRICS bè tơn jơh kòp bơtờp tàm mpồl bơtiàn. Tàm 2 ngai bơyai lơh pơrjum, ală lơgar geh jơng tàm BRICS neh tơrgùm tàm ală tơngume sơlơ tơnguh tai lơh broă bal tàm ală gah bè: lơh sơnơm, bồ tơngoh jak kòn bơnus lơh gơs mờ tam gơl nhơl trồ tiah.