Pah ngai, oh Lang Thị Yến Vy, bơsram ơdŭ 7, Hìu bơsram kấp bàr Nguyễn Thị Định, sàh tiah nhàr lơgar Ia Rvê, càr Dăk Lăk pal sơrlèt mờ gùng ngài rơlao 10 kơi sồ hơ̆ sồng tus hìu bơsram. Tŭ git tàm hìu bơsram mờ oh gam bơsram do tơn rơ̆p geh lơh dờng niam mờ kwơ màng rơlao là geh hìu ơm sa bic tơn, oh Yến Vy chờ hờp pà git: “Bơta ngài bơh hìu oh tus hìu bơsram di pơgăp 10 kơi sồ. Tàm kàl mìu gùng gơbam dà uă ngan mờ oh pal lòt gùng rơwềng, ngài rơlao bơh 14 tus 15 kơi sồ. tàm kàl prang den gùng gơthul duh mờ broă lòt rê gơtìp glar bòl ngan, rê tus tàm hìu ờ kờñ sào sa tai. Tŭ git hìu bơsram oh dê gam geh lơh hìu bơsram pa, oh chờ hờp ngan. Kơ̆p kờñ geh hìu bơsram pa nàng bol oh gơtùi bơsram niam rơlao”.

Jơnau bơh oh Yến Vy dê kung là nùs nhơm bal bơh git nđờ rơhiang nă kơnòm bơsram bal mờ cau mè bèp kơnòm bơsram tàm tiah nhàr lơgar càr Dăk Lăk kờñ ngan bơh git nđờ nam do: lơh sa kal ke, broă bơsram sră gơtìp uă gơkòl. Bơh tàm ală bơta kơlôi rơcang do, gùng dà bơcri priă lơh ală hìu bơsram ơm sa bic tơn bàr kấp bơh kấp dùl tus kấp bàr tàm ală sàh tiah nhàr lơgar geh lơh, pờ geh jơnau kơ̆p kờñ pa ai broă “bơto sră” tàm tiah nhàr lơgar càr Dăk Lăk in. Jăt broă rơndăp lơh tơngai bơh nam 2025 tus 2030, càr rơ̆p lơh 5 hìu bơsram ơm sa bic tơn bàr kấp bơh kấp dùl tus kấp bàr tàm 4 sàh tiah nhàr lơgar mờ 1 sàh rềp bal tiah nhàr lơgar in. Ală hìu bơsram geh bơcri priă lơh ndrờm bal jơdŭ bơsram, hìu ơm bal, hìu sa, hìu sền sră, tiah tàp pràn să jan, jơdŭ bơsram tin họk, phan ai dà sàng kloh mờ ală broă lơh ndai, gàr niam nàng kơnòm bơsram sră, sào sa, ơm tơrgùm bal tàm bơta niam ngan. Ồng Nguyễn Văn Hoa, Củ tịc Anih duh broă Làng bol sàh Ia Rvê, càr Dăk Lăk pà git, do mùl màl là bơta chờ dờng màng ngan gơwèt mờ gơnoar atbồ bal mờ làng bol kis tàm tiah nhàr lơgar dê. Làng bol ală jơi bơtiàn tàm sàh ring nùs mờ kờñ bal, ai tơl ală bơta niam nàng broă lơh hìu bơsram mhar lơh gơs. “Do là dùl broă lơh geh kwơ màng ngan nàng ală oh kòn tơrgùm bal ơm sào sa tàm hìu ơm sa bic tơn, làng bol ală jơi bơtiàn tàm sàh sền gròi ngan mờ kờñ ngan nàng oh kòn geh bơsram sră”.

Ồng Trương Công Thái, Phó Củ tịc Anih duh broă Làng bol càr Dăk Lăk pà git, tàm khà 5 hìu bơsram ơm sa bic tơn bàr kấp tiah nhàr lơgar geh lơh bơh càr dê, geh 4 hìu bơsram geh bơcri priă lơh mờ kes priă Dà lơgar dê, 1 hìu bơsram ngui kes priă bơh Ƀộ Ling klàng mờ kờp jơh khà priă bơcri lơh di pơgăp 630 tơmàn đong. Tơl hìu bơsram di pal mờ jơnau kờñ bơsram sră ai pơgăp bơh 1 rơbô tus 1 rơbô 200 nă kơnòm bơsram in. Do ndrờm là ală broă lơh geh kwơ màng mpồl bơtiàn bal mờ cíñ trị dê, ờ mìng drơng kơnòl broă bơto bơtê mờ bơsram mờ gam pơgồp bal mờ broă lơh broă sa mpồl bơtiàn, kơl jăp rài kis làng bol in, gàr niam broă sền gàr dà lơgar, lơngăp lơngai tiah nhàr lơgar.

Den tàng, ală sờh, gah lơh broă, ală sàh tơrgùm pơgồp bal nền nòn tàm broă lơh nàng lơh gơs di mờ jơnau neh geh ai, kơl jăp mờ di tơngai hơ pơrgon. “Tơrgùm pơgồp bal tàm broă bơyai lơh bơh broă gàr tơl niam bă ù lơh tus mờ broă tŭ cau dờp bơcri priă lơh ală broă lơh, tàm hơ̆ geh bal broă sền nàng git, jăt sền tàm broă lơh pal lơh jăt di mờ jơnau neh geh ai”.

Jăt mò Lê Thị Thanh Xuân, Kwang lam bồ Sờh Bơto bơtê mờ Bơsram càr Dăk Lăk pà git, broă lơh hìu bơsram ơm sa bic tơn bàr kấp ờ mìng là bơta kwơ is bơh tiah nhàr lơgar gơtìp kal ke dê. Gah bơto bơtê bal mờ ală sàh tàm càr rơ̆p kơlôi sơnơng nền nòn broă lơh do nàng lơh geh uă tàm tơngai tus. Sờh rơ̆p dan mờ Anih duh broă Làng bol càr bơ̆t bơtàu tơngai bơtàu tơnguh dờng ơnàng broă lơh hìu bơsram bàr kấp, ai geh bơta niam nàng ală kơnòm bơsram in geh bơsram sră sùm bơh mầm nòn tus kấp pe: “Tàm broă lơh lài do, ală sàh rơ̆p geh broă rơndăp lơh nàng lơh geh uă ală broă lơh, nàng bơtàu tơnguh ală kấp bơsram dờng rơlao nàng ală oh geh tơl bơta bơsram sùm bơh mầm non, kấp dùl, kấp bàr mờ kấp pe geh bơta niam nàng ală oh bơsram sră geh tơl niam rơlao”.

Ală hìu bơsram gam rơhời lơh gơs tàm tiah nhàr lơgar càr Dăk Lăk dê, ờ mìng geh bơta kwơ bè đah phan bơna, ală broă lơh do gam cèng geh jơnau kơ̆p kờñ dờng màng bơh kấp ủy, gơnoar atbồ bal mờ làng bol dê tàm broă “bơto sră” tàm ală tiah gam uă kal ke. Bơh ală ơdŭ bơsram pa, ală hìu ơm bal geh lơh niam, mpồng pa gam pờ dờng nàng ală oh tàm tiah nhàr lơgar in, cèng bal jơnau kơ̆p kờñ bè dùl càr Dăk Lăk bơtàu tơnguh kơl jăp, do là tiah bơta ngăc ngar rơ̆p sòl àng rài tơnơ̆ do in bơh tàm ală bă ù tiah nhàr Dà lơgar dê.