Thủ tướng Cíñ phủ ồng Phạm Minh Chính đơs niam ngan Kwang ătbồ Anih lơh broă ala măt lơgar Pakistan ồng Kohdayar Marri kờp bơh tŭ dờp kơnòl broă neh jơh nùs chồl tơngguh lơh broă bal đah Việt Nam mờ Pakistan, is ồn tàm broă niam chài, đơs crih tam ya, pin dờn jăt yàng, pơgồp bơnah tơngguh tai gĭt wă bal mờ gơ̆p đah 2 lơgar. Thủ tướng Cíñ phủ đơs sùm Việt Nam mờ Pakistan geh uă bơta pràn lơh broă bal kờñ geh jơh nùs lam lơh nàng ai gĭt gơ̆p 2 lơgar bơtàu tơngguh ngan ngồn rlau tai, tă pơgồp ai ring lơngai, kơ̆ kơl jăp mờ lơh broă bal đah bàr kơnhoàl ù tiah đah jum câu Á mờ tiah đah jum măt tơngai lik câu Á in, kung bè ai kơnhoàl ù tiah câu Á- Thái Bình Dương mờ Ấn Độ Dương in đơs bal.

Thủ tướng kung sồr 2 gah sơlơ tơngguh tai lơh broă bal lơh sa- kă bro phan, bơcri priă, ngui jơh ală bơta pràn mờ bơta ƀươn bơh 2 lơgar dê, pơnđơl gờñ tơngguh priă lơh geh bơh kă bro phan đah 2 gah gơguh rlau 1 tơmàn dolar Mỹ; mơkung rề ơnàng lơh broă bal tàm ală broă niam chài, bơto bơtê, lòt nhơl, tìp măt lơh kwèng làng bol.