Tàm dơ̆ yal neh yal Jơnau lơh nền bơh Thủ tướng Cíñ phủ dê bè tơlik mat Anih duh broă Dà lơgar APEC nam 2027 geh 19 nă kwang bàng, tàm hơ̆, Phó Thủ tướng, Ƀộ trưởng Ƀộ Cribơyai broă mờ lơgar ndai ồng Bùi Thanh Sơn là Củ tịc Anih duh broă Dà lơgar APEC nam 2027.

Đơs tàm dơ̆ yal, Thủ tướng ồng Phạm Minh Chính đơs sùm: do là broă lơh kwơ màng ngan, đơs nền bơta sền dờng màng mờ nùs nhơm jơh nùs bơh Việt Nam dê tàm broă chồl mhar broă lơh rcang lài ai Nam APEC 2027 – dùl kơnòl broă Cíñ trị lơh broă mờ lơgar ndai kwơ màng ngan gơwèt mờ lơgar Việt Nam. Thủ tướng pin dờn mờ nùs nhơm dồ nùs bal, jơh nùs mờ lơh broă kràñ cê jơh nùs bơh Việt Nam dê, mờ bơta dong kờl bơh ală rài lơh sa tàm mpồl mờ Mpồl Kwang gơnoar cih APEC, Nam APEC 2027 rơ̆p lơh geh cồng nha niam ngan, pơgồp bơnah ai lơh broă bal APEC gơguh tus dùl gơnoar broă pa, lơh geh bơta kơ̆p kờñ bơh ală lơgar tàm mpồl mờ pơgồp bơnah tàm ring lơngai, lơh broă bal, bơtàu tơnguh mờ pas gơs tàm câu Á- Thái Bình Dương mờ tàm dunia.