Dờp jơnau jà bơh Thủ tướng ồng Phạm Minh Chính, Thủ tướng lơgar Tây Ban Nha ồng Pedro Sánchez geh dơ̆ tus còp mùl màl lơgar Việt Nam bơh ngai 08 tus ngai 10 nhai 4. Do là dơ̆ sơnrờp Thủ tướng lơgar Tây Ban Nha còp mùl màl lơgar Việt Nam bơh tŭ bàr lơgar crơng gơs bơta git gơ̆p cri bơyai broă mờ lơgar ndai tàm nam 1977 mờ kung là dơ̆ tus còp mùl màl lơgar Việt Nam dê bơh Đơng lam kấp dờng lơgar Tây Ban Nha dê bơh tŭ tus còp bơh Cau Bơtau ồng Juan Carlos mờ pơ-ùr mò Sofia tàm nam 2006.

Lơgar Tây Ban Nha là lơgar tàm mpồl sơnrờp ngan bơh mpồl tam klăc câu Âu dê kĭ hơ git gơ̆p Tam klăc lơh broă bal jŏ jòng mờ lơgar Việt Nam tàm nam 2009. Lơgar do kung là dùl tàm ală lơgar sơnrờp ngan sền swì ring bal Jơnau kĭ hơ sền gàr dong kờl bơcri priă mpồl EU mờ lơgar Việt Nam. Dơ̆ tus còp là cơng tàng  tơngŏ ngan ngồn ai cồng nha lơh broă bal niam bơnĕ đah bàr lơgar dê tàm tơngai do, bơh cíñ trị tus lơh sa, kă bro phan, bơcri priă, niam chài, sền gàr dà lơgar, lơngăp lơngai, bơto bơtê mờ bơsram bal mờ lòt rê jun pơn diang…