Thủ tướng yal mờ làng bol in bè broă tàm lơgar, nam 2024, Việt Nam neh lơh geh ală broă kwơmàng ngan tàm jơh ală broă, lơh sir jơh 15 broă jàu bơtàu tơngguh lơh sa- mpồl bơtiàn, tàm hơ̆ 12 broă jàu sơrlèt broă rơndăp lơh dê sồr. Gơguh GDP nam 2024 geh 7,09%, kờp priă GDP geh 476 tơmàn dolar Mỹ, gơ wèt mpồl 35 lơgar geh rài lơh sa dờng ngan rlau jơh dunia. Việt Nam pơn jăt tai gàr kơnhăp lơh sa dờng, gròi sền roh giă priă, ală tàm pơnring dờng geh gàr niam.

Di dơ̆ do, Thủ tướng brơn brài yal mờ mpồl bơtiàn cau Việt Nam tàm lơgar Czech in broă Anih duh broă Mặt trận Dà lơgar Việt Nam neh lơh nền rwah Praha là tiah drơng lơh bơyai lơh Ngai chờ Tam klăc dờng jơi bơtiàn tàm lơgar ndai dơ̆ sơnrờp; tơnggŏ bơta cih dờp mờ đơs niam ngan gơ wèt mờ ală broă lơh geh mờ tă pơgồp bơh mpồl bơtiàn cau Việt Nam dê tàm lơgar Czech. Thủ tướng kơ̆p kờñ làng bol lơh jăt niam adăt boh lam tiah he ơm kis, sùm tam klăc, dong kờl bal, tàm jơm glòm bal mờ gơ̆p, đòm jăt nùs nhơm “tàm kờñ gơboh bal”, “nùs nhơm jơi bơtiàn bal, kơnòl pròc mhàm bal”, ngan là tàm rài kis kal ke, gơtŭ gơtơl.