Thủ tướng ồng Phạm Minh Chính pơyua jơnau chờ gờm jơh nùs jơh tồr ngan tus jơh gùt mpồl pơlam tàp mờ mpồl lòt tàm pơrlòng coh plai Dà lơgar Việt Nam dê tơnơ̆ tŭ lơh geh cồng nha jak ngan tàm dơ̆ tàm pơrlòng dar dŭt ndơl dơ̆ lòt mờ dơ̆ rê.

Thủ tướng tơlik nùs nhơm pơñiờ ngan, ưn ngài Mpồl lòt tàm pơrlòng neh lơh ngan jak ngan, tàm pơrlòng khin cha kơ̆ nùs ngan, khin cha ngan, tam klăc bal, ờ gŏ ơm rlô; Đơs nền, cồng nha do ờ mìng là bơta pơñiờ bơh tàp pràn să jan Việt Nam dê lơm mờ gam là bơta gơdơn ai jơh gùt jơi bơtiàn dê in tai, tơnggŏ bơta kơ̆p kờñ sùm brồ guh mờ lơh geh ală cồng nha jơnhoa pa. Thủ tướng pơyua jơnau ưn ngài uă ngan tus mờ mpồl pơlam tàp, mpồl dong kờl, ală cau lòt bal mờ mpồl lòt tàm pơrlòng. Thủ tướng is ồn ưn ngài ngan gĭt nđờ tơlak nă cau kờñ coh plai tàm jơh gùt lơgar neh lòt bal, ơm rềp bal mờ là anih kơldìng kơ̆ kơl jăp bơh mpồl lòt pơrlòng dê tàm jơh gùt tŭ tơngai lòt tàm pơrlòng lơh geh khà jơnhoa ngan rlau jơh bơh coh plai kơnhoàl ù tiah do dê.

Gĭt nđờ rơbô nă cau pơn jờng lơgar Việt Nam geh mat tàm ƀlàng coh plai Dà lơgar Thái Lan Rajamangla tàm càr lơgar Bangkok mang ngai 05/01, neh ngoh rơngăc uă ngan tŭ mpồl lòt tàm pơrlòng coh plai Dà lơgar Việt Nam neh coh sa lơgar Thái Lan nàng ai geh khà jờng dờng ngan rlau jơh Asean Kŭp 2024. Cau kờñ sùm driau dờng “Việt Nam jak ngan” mờ đơs bal jơnau đơs crih “Bè geh Wa Hồ tàm ngai chờ jai pha dờng”. Uă ngan làng bol tàm jơh gùt lơgar neh lik tàm gùng gờm chờ jai pha. Do kung là khà jờng dờng dơ̆ 3 bơh mpồl lòt tàm pơrlòng coh plai Dà lơgar Việt Nam dê tàm dơ̆ tàm pơrlòng do.

Nùs nhơm chờ hờp jai pha kung geh bơyai lơh tàm jơh gùt tiah Tây Nguyên dê sơl. Tàm  sơnĕ  6, tiah tờm ƀòn dờng Buôn Ma Thuột, càr Dăk Lăk, jơh ală mpồl cau ndrờm rê tàm tiah tờm, tàm tê ià bồng bi pơr hê sơrmañ rơmĭt, đơs bal jơnau đơs crih “Bè geh Wa Hồ tàm ngai chờ jai pha dờng”. Jơh ală ndrờm đơs bal jơnau đơs crih jai pha dờng, tàm bơrlŭ bal mờ bơta àng phăo bơkào niam ngan tềng hơđang kơlwàng trồ.