Mang òr (30/07), jăt jơnau sồr bơh đah lơgar Malaysia, Thủ tướng ồng Phạm Minh Chính neh geh dơ̆ cri bơyai tàm điện thoại mờ Thủ tướng lơgar Malaysia ồng Anwar Ibrahim kung bè broă bơh lơgar Malaysia tàm gơnoar broă Củ tịc mpồl ASEAN tàm broă lơh pràn bơsong bơta tung lơtang tàm tiah nhàr lơgar đah lơgar Campuchia mờ lơgar Thái Lan; tàm hơ̆ uă ngan là broă neh bơyai lơh dơ̆ tìp măt bal đah Thủ tướng lơgar Campuchia mờ Gơnoar atbồ ing Thủ tướng lơgar Thái Lan tàm ngai 28 nhai 7 pa do mờ neh geh jơnau ring bal ơm ờ cuh phào, là broă lơh niam sơnrờp dong kờl sền gròi gơguh tam lơh đah bàr lơgar dê.

Cri bơyai bè broă lơh broă bal đah bàr lơgar, bàr Thủ tướng ring bal rơ̆p pơn jăt tai cri bơyai, tơnguh nùs nhơm pin dờn, pơgồp bal geh ală broă lơh nàng lơh nền nòn rơlao tai Bơta git gơ̆p Tam klăc bal Jŏ jòng tơl ală bơta, tàm hơ̆ tơrgùm lơh pràn broă cri bơyai pa bơceh lơh, jăk chài măi mok pa, năng lượng, lơh gùng che ồs đèng đah lơgar Việt Nam mờ lơgar Malaysia, Singapore nàng lơh gơs gùng che ồs đèng mpồl ASEAN; gờñ kĭ jơnau ring bal bè kă bro phe nàng lơgar Việt Nam dong kờl tơl phe sa ai lơgar Malaysia in.