Mho ngai 10/02, Thủ tướng ồng Phạm Minh Chính đơng lam Dar pơrjum dơ̆ 11 Mpồl Sồr lơh Tơn jơh broă lơh jăt Jơnau lơh nền tàm pơrjum sồ 18 bơh Dà lơgar dê. Dar pơrjum tơrgùm ai jơnau đơs bè ală jơnau neh lơh nền rơndăp tăp sèng ală anih lơh broă lùp sền tơrmù dipal, tơl, pràn, lơh broă pràn, gơtùi, geh cồng nha. Tàm hơ̆ sền swì bè jơnau kờñ, bơta pal jăt bơh broă rơndăp tăp sèng ală anih lơh broă lùp sền dê; gĭt nền gơnoar broă, kơnòl broă, broă lơh tơrlòng lài rơndăp mpồl lơh broă; dan sồr rơndăp mpồl lơh broă gah lùp sền jăt 2 kâp tàm Dà lơgar mờ ƀòn lơgar là kâp càr.

Đơs pơndŭt dar pơrjum, Thủ tướng ồng Phạm Minh Chính đơs sùm, broă rơndăp tăp sèng ală anih lơh broă lùp sền pal ơn bơta kwơ dà lơgar dê, làng bol dê hơđang rlau jơh; lơh jăt gùng dà, jơnau sồr bơh Đảng mờ Dà lơgar dê, lơh geh jơnau kờñ tơrmù anih tờm mờ cau lơh broă sa priă nhai dà lơgar, tơngguh uă bơta pràn lơh broă, lơh geh cồng nha lơh broă bơh gah lùp sền dê. Bal mờ hơ̆, broă rơndăp tăp sèng rơndăp mpồl lơh broă pal bơsong ală bơta ờ hềt dipal, ờ hềt pràn jak, tàm rơndăp tàm rơndồl tàm rơndăp broă, lơh broă bơh ală anih lơh broă lùp sền dê bè tŭ do. Thủ tướng sồr Lùp sền Cíñ phủ, Ƀộ Broă dơlam is mờ anih lơh broă geh gơrềng sơrbac mhar lơh gơs ală jơnau neh lơh nền nàng dan Ƀộ Cíñ trị mờ Mpồl Sồr lơh Dà lơgar in sền swì mờ rơcăng yal mờ Quôk hội in tơnơ̆ tŭ Ƀộ Cíñ trị neh ai jơnau đơs.