Drim ngai 22/04, tàm Hìu duh broă Cíñ phủ dê, Thủ tướng ồng Phạm Minh Chính đơng lam dar pơrjum mờ ală ƀộ, gah nàng sền swì broă, bơyai broă lơh bơsong tam gơl dia, priă pal tă gơ wèt mờ phan bơna tăc, blơi mờ lơgar ndai. Thủ tướng ồng Phạm Minh Chính pà gĭt, tơnơ̆ yal bơr bè broă lơh dia tăc blơi phan mờ lơgar ndai lơgar Mỹ dê, Cíñ phủ neh geh dồ ròt broă lơh bơsong di tŭ, rơcăng lài bè cíñ trị, cribơyai broă mờ lơgar ndai; rơcăng lài ai lơh jăt Jơnau lơh nền Cíñ phủ dê, koh tơrmù ală sèng dia gơ wèt mờ bàr pe bơta phan lơgar Mỹ dê gơ rê zero. Tus tŭ do, bàr pe rơndăp broă lơh lơgar Mỹ sền gròi kung rơhời bơsong tàm tơngume kơrnoăt boh lam mờ jơnau ring bal đah 2 lơgar.

Tềng đăp bơta pa, Thủ tướng sồr mờr tus pal rơcăng lài ngan, bơceh lơh, nùs nhơm khin cha tàm bơyai; đòm jăt ală mờng chài neh geh bơh lài tus tŭ do nàng tam bơyai. Bè bơta pal jăt, Thủ tướng đơs sùm broă jăt nền ală jơnau sồr lơh bơh Ƀộ Cíñ trị, Tổng Ƀí thư, Cíñ phủ, Thủ tướng Cíñ phủ dê; lùp jơnau sồr bơh lơgar Mỹ dê nàng geh broă rơndăp lơh; gĭt nền tàm bơyai là broă lơh bơsong kwơmàng, tờm ngan nàng lơh tàm pơnring kă bro phan lơgar Mỹ dồ bă kơnhăp mờ jŏ jòng.