Jơnau yal tàm pơrjum, ala măt Ƀộ Bơ̆t bơtàu pà git: 05 rơndăp broă lơh gùng rơndeh lòt mhar tàm tiah ring Dà dờng Cửu Long jòng di pơgăp 206 kơi sồ.

Jăt broă rơndăp lơh geh lơh gơs tàm nam 2025 do mờ tŭ do ală rơndăp broă lơh do ndrờm gam lơh di mờ tơngai geh ai, ală bơta kal ke, gơkòl neh geh bơsong. Thủ tướng sồr ală kấp, ală gah lơh broă pal lơh ngan mhar, ndrờm bal ngui ală gùng dà broă lơh ƀuơn niam ngan nàng tơrmù tơngai, sră nggal ai lơh, lơh geh phan lơh gùng pa nàng di pal mờ tơngai geh ai bơh ală rơndăp broă lơh dê. Anih lơh broă tờm ală rơndăp broă lơh pal sồr cau tờm bơcri priă, cau lơh, lơh di jăt tơngai geh ai; tơnguh cau lơh broă, măi mok phan lơh broă, priă jền nàng bơyai lơh ngai kung bè mang, nàng lơh gơs ală rơndăp broă lơh di mờ tơngai neh geh ai, kơl jăp, lơngăp lơngai broă lơh gùng in.