Ngai 4/05, Thủ tướng Cíñ phủ ồng Phạm Minh Chính đơng lam dơ̆ pơrjum Duh broă sùm Cíñ phủ sền sơwì, tă pơgồp jơnau đơs bè sền sơwì bơta lơh sa- mpồl bơtiàn nhai 4 mờ 4 nhai bồ nam do; mơkung tă pơgồp jơnau đơs tàm bàr pe tơngume ndai nàng kờñ rcang ai dar pơrjum Cíñ phủ ờs mờng nhai 4 nam 2025 kung bè bàr pe broă lơh, kơnòl broă kwơ màng ndai tàm tơngai tus.

Đơs tàm pơrjum, Thủ tướng sồr ală ƀộ, gah broă, ală tiah pơn jat tai kràñ cê jơh nùs tơrgùm lơh jat ală kơnòl broă, broă lơh sơlơ tơnguh tai gơguh lơh sa tàm tơngai lơh sa dunia geh uă kal ke, bơta lòng; gàr niam lơh jat ală jơnau kờñ gơguh lơh sa neh geh ai jat ală Jơnau lơh nền tàm pơrjum, Jơnau đơs pơndŭt, jơnau sồr lơh bơh Dà lơgar, Ƀộ Cíñ trị, Quôk hội, Cíñ phủ; sền gròi lơh pa ală bơta gơn kơnờm gơguh lơh sa ờs mờng mờ sơlơ tơnguh tai ală bơta gơn kơnờm gơguh lơh sa pa. Mơkung pal rcang niam ală tơngume drơng pơrjum dơ̆ 9, Quôk hội khoă 15  mờ khà dờng ngan ală jơnau neh lơh nền, rơndăp broă lơh adat, Jơnau lơh nền tàm pơrjum,...