Tơnơ̆ tŭ iăt ală jơnau đơs, đơs tàm pơrjum, Thủ tướng ồng Phạm Minh Chính pà gĭt, tàm tiah đah Tô Dà lơgar, ală tiah geh bơta gơn kơnờm, ală tiah gơguh lơh sa ơm tàm tiah ring dà dờng Hồng, tŭ do pa geh 1 nơm ƀlàng rơndeh par dờng là ƀlàng rơndeh par ală lơgar Nội Bài tŭ do gam hat hal ir.

Jơnau sồr ai tơlik pal geh ƀlàng rơndeh par kờñ bơtàu tơnguh ai tiah do in, drơng broă lơngap lơngai sền gàr Dà lơgar, mơkung drơng broă bơtàu tơnguh lơh sa mpồl bơtiàn, tơrmù ƀà bơta kơn jơ̆ ai ƀlàng rơndeh par ală lơgar Nội Bài in. Thủ tướng đơs sùm, pa do neh sơnđờm mut lơh tơngai dơ̆ 1 bơh ƀlàng rơndeh par Gia Bình, càr Bắc Ninh mơya nàng tềm pềr tŭ tơngai, dà kơl hề, priă jền den pal rơndăp ù tiah ƀlàng rơndeh par ală lơgar dờng nàng lơh geh jơnau kờñ bơtàu tơnguh, sền gàr lơngăp lơngai Dà lơgar. Den tàng, pal kơlôi sơnơng di tŭ rề ơnàng mờ lam lơh tơngai dơ̆ 2 tàm tŭ gam lơh tŭ tơngai dơ̆ 1, pleh lơh pơhì pơhà tŭ tơngai, dà kờl hề, priă jền. Thủ tướng sồr kơlôi sơnơng đah gơl gùng mờ rơndăp broă lơh tàm tơrbŏ bal mờ càr lơgar Hà Nội mờ nùs nhơm pal tàm tơrbŏ bal mhar ngan rlau jơh, song ngan rlau jơh, geh cồng nha ngan rlau jơh.