Tơnơ̆ tŭ iăt jơnau yal bơh Ƀộ Lơh broă sa mờ măi mok mờ Kă bro phan, jơnau đơs bơh ală cau ala mat ală Ƀộ, gah broă, anih lơh broă, jơnau đơs pơndŭt, Thủ tướng ồng Phạm Minh Chính đơs là tus tơngai tŭ do, đah lơgar Mỹ neh ai tơngai cribơyai ngan ngồn, pà gŏ nùs nhơm kờñ, jat jơnau hơ tàm dơ̆ tìp mat kấp dờng mờ ală dơ̆ lơh broă, tìp mat tơnơ̆ dơ̆ lơh broă đah 2 gah dê.

Thủ tướng sồr, tàm tơngai cribơyai pal jat tàm ală bơta, bơta gơlik geh ngan ngồn nàng tam gơl niam tơngai lơh broă di pal ai jơh bal 2 gah in. Thủ tướng sồr rcang lài nền nòn ală tơngume cribơyai; jat tàm jơnau sồr bơh lơgar Việt Nam dê mờ jơnau sồr đơs bơh lơgar Mỹ dê, jat tàm cồng nha kơlôi sơnơng, ală bơta geh ngan bơh Việt Nam mờ cribơyai ală jơnau hơ ală lơgar nàng ai geh gùng dà broă lơh cribơyai di pal, tơngŏ nùs nhơm bơt bơtàu, nùs nhơm niam mờ is ồn là bơta lơh broă niam, jat tàm nùs nhơm lơh bơyô bal mơya song dơ pă, nùs nhơm kơ̆ ngan.