Pơrjum Mpồl Duh broă Đảng Dà lơgar nhai 1 nam 2025 neh lơh nền uă gùng dà broă lơh, broă lơh kwơ màng bè rơndăp tăp sèng, tơrgùm mpồl cau lơh broă; tam gơl jơnau kờñ gơguh lơh sa nam 2025 lơh geh 8% rlau hơđang nàng tam gơl pràn, pơn đơl pràn lơh ngan lơh sir Broă rơndăp lơh 5 nam bơh nam 2021-2025 mờ lơh geh bơnàng jă kơ̆ kơnhăp, wèt tus jơnau kờñ gơguh lơh sa 2 nơm sồ tàm tơngai bơh nam 2026-2030.

Đơs pơndŭt pơrjum, Thủ tướng ồng Phạm Minh Chính neh sơñio loh ală broă neh lơh geh, ờ hềt  lơh geh tàm nhai 1, jơnau tờm gơbàn mờ jơnau bơsram mờng chài. Tàm tơngai tus, Thủ tướng sồr, jat tàm Jơnau lơh nền tàm pơrjum bơh Đảng, bơta đơng lam, sồr lơh bơh Dà lơgar, Ƀộ Cíñ trị, ală kwang đơng lam bồ tờm dê, nàng lơh ngan ngồn broă rơndăp lơh, broă lơh jat bơh tơl kấp, tơl gah broă, tơl tiah dê. Pal geh nùs nhơm lơh ngan uă, pơnđơl pràn lơh ngan dờng, lơh broă kràñ cê jơh nùs bơh ngai sơn rờp, nhai bồ nam 2025 dê. Tàm ală mờng chài đơng lam neh geh, kờñ pal pràn kơl dang rlau tai, lơh tờm ală bơta rlau tai, lơh broă geh cồng nha rlau tai; tơnguh uă cồng nha tàm pơgồp bal, ngan là tàm broă bơsong ală broă ală gah, ală kơnhoàl ù tiah; rcang lài jơnau yal mờ đơs gùng dà broă lơh ală broă sơrlèt mờ gơnăp gơnoar.