Thủ tướng đơs sùm, broă rcang lài kơryan pơhì pơhà sùm geh Đảng, Dà lơgar sền gròi mờ is ồn tàm tơngai bè tŭ do Dà lơgar gam ơm tềng đăp tŭ tơngai kah yau nàng mut tàm rài brồ să bơh jơi bơtiàn dê. Cíñ phủ neh tơnggơs Mpồl Sồr lơh Rcang lài kơryan pơhì pơhà mờ bơnah geh bal Kwang atbồ jơh ală Ƀộ, anih lơh broă drờm mờ Ƀộ nàng lơh bơsong jơh ală tiah gơ kòl lơh hoàc huơr, pơhì pơhà ală priă jền rài lơh sa dê, lơh geh bơta tam gơl pa, geh bơta lơh gơrề uă pràn ngan gơwèt mờ broă lơh do dê.

Thủ tướng sơñio loh, dơ̆ pơrjum sơn rờp do nàng bal mờ gơ̆p kờp sền wơl ală broă lơh neh lam lơh, ală cồng nha neh lơh geh, kal ke, bơta ờ hềt lơh geh mờ jơnau tờm lơh gơbàn, ai tơlik ală jơnau bơsram mờng chài nàng lơh bơnàng jă ai tơlik ală kơnòl broă, broă bơsong ai tơngai tus in; ngan là broă tă bơsong kal ke, kòl yan ai ală rơndăp broă lơh gam tàm rơndăp rơndồl jŏ jòng nàng gờñ bơsong tơn jơh, lơh soah bơta pràn ai rài lơh sa in.