Tàm dơ̆ bơyai lơh, Thủ tướng đơs là: Tŭ tơngai mut gơ rờm bal geh uă kal ke, mơya bol he mut gơ rờm bal ờ kơp gơn, ờ gơ wèt tàm khat dùl mpồl lơh broă bal lơi; ờ mìng ngui tŭ niam, bơta niam bơh mut gơ rờm bal dê mờ gam gơ dờp geh cồng nha mờ bơta ờ niam nàng bơtàu tơnguh mhar, kơ̆ kơljap tai. 

Thủ tướng đơs là: Ƀộ khà sơñio FTA neh yal jơnau tơnggit loh làng, song dơpă, tơl làm bè khà lơh jat ală jơnau hơ pơrgon FTA tàm tơl càr, ƀòn dờng; lơh bơnàng jă kuơmàng, dong Cíñ phủ mờ ală ƀộ, gah broă lơh, càr, ƀòn dờng ai tơlik gùng dà broă lơh adat boh lam, broă lơh đơng lam lơh gơlik phan, tac mờ blơi phan bơh lơgar ndai, gàr di mờ bơta geh ngan, gơtùi lơh jat ngan ngồn nàng kờñ chồl tơnguh lơh sa kă bro, tac mờ blơi phan bơh lơgar ndai.

Broă sơlơ tơnguh tai pơrjum bơyai, kĭ mờ lơh jat ngan ngồn 17 FTA mờ jơh ală rài lơh sa, ală mpồl lơh broă bal dờng tàm ală lơgar, lam Việt Nam gơ gơs là dùl tàm ală lơgar lam lài tàm tiah do mờ ală lơgar bè tus bal ală jơnau pal jat lơh broă bal lơh sa 2 gah mờ uă gah. Broă ngui, lơh jat ngan ngồn geh cồng nha ală FTA kung pơgồp bơnah sơlơ tơnguh priă lơh geh bơh tac mờ blơi phan bơh lơgar ndai gơguh pràn, gàr kơ̆ giă priă tàm lơgar pơn drờm mờ priă lơgar ndai mờ ală sơñio khà sồ lơh sa dờng, tă pơgồp kuơmàng, jơh nùs tàm bơta bơtàu tơnguh lơh sa bơh dà lơgar dê.