Rơndap broă lơh do jòng 110 kơi sồ, tus tŭ do neh lơh geh 66% tơngai hơ pơrgon, ai ù lơh rơndap broă jơh gùt gơl gùng lòt gan 5 càr, ƀòn dờng geh Cần Thơ, Hậu Giang, Bạc Liêu, Cà Mau mờ Kiên Giang neh lơh gơs 100%. 

Thủ tướng jờng rơ bơta lơh ngan bơh càr Cà Mau dê tàm broă ai ù lơh rơndap broă mờ sơn đờm lơh Hìu sơnơm Cà Mau. Thủ tướng đơs nền: “Kờñ Cà Mau bơtàu tơnguh den pal geh ƀlàng rơndeh par, anih ơhò ơm tàm dà lềng, gùng rơndeh lòt mhar” mờ kung sồr ală cau tờm bơcri priă ngui cau lơh broă mờ mpồl lơh sa kă bro càr dê. Mờ nùs nhơm “Sa jơ jal, bic jal mhar, lơh broă 3 ka 4 kíp”, Thủ tướng sồr Mpồl atbồ Mỹ Thuận tơnguh mhar tơngai lam lơh, lơh gơtùi jơnau kờñ lơh gơs rơndap broă lơh, ai ngui di tàm ngai 19/12/2025.