Tus còp, pơndờm pơnđiang mpồl bơtiàn cau Việt Nam tàm Anih tờm Kă bro phan Sapa, Thủ tướng ồng Phạm Minh Chính neh còp Anih tờm dà Yoan Praha. Ală cau pơgru bơto bơsram tàm nùs nhơm dong kờl is, ờ dờp priă nhai mờ mìng geh dùl bơnah dong kờl dềt rơhền kờp jat jiơ lơm. Tàm 22 nam do, Anih tờm neh bơto dà Yoan ai gĭt nđờ rơbô nă sau deh mờ dờng tàm ù tiah lơgar Czech dê gĭt sền sră, gĭt cih, gĭt đơs chài ngan.

Thủ tướng ồng Phạm Minh Chính đơs sùm, dà Yoan là bơta tàm tơrbŏ đah ală rơnàng lài do mờ tơnơ̆ do, dong rơnàng kơnòm să Việt Nam kis tàm lơgar ndai gĭt wă tai bè bơhiàn niam chài, kah yau bơh Dà lơgar dê, bơto pơlam nùs nhơm kờñ gơboh Dà lơgar, pơn yờ să jơi bơtiàn. Sồr Anih tờm pơn jat tai lơh li la uă ală broă lơh, lơh broă bơto mờ bơsram, lơh geh bơta gơ kờñ ai ală sau in bơsram sră.