Mho òr (25/03), Thủ tướng Cíñ phủ ồng Phạm Minh Chính đơng lam Dar pơrjum duh broă sùm Cíñ phủ, iăt Ƀộ Bơto bơtê mờ Bơsram bal mờ Ƀộ Lơh sơnơm yal bè ală jơnau rơcang cih ală jơnau neh lơh nền kwơ màng yal Ƀộ Cíñ trị in. Tàm dar pơrjum, Thủ tướng ồng Phạm Minh Chính sồr rơhời bơto uă rơlao tai dà Mỹ tàm broă bơto kấp dùl mờ bơto bơtê pe kâp.

Jơnau rơcang cih Jơnau lơh nền tàm pơrjum bơh Ƀộ Bơto bơtê mờ Bơsram dê ai jơnau kờñ nàng tơnguh uă bơta niam broă bơto, bơsram; bơ̆t bơtau, bơtàu tơnguh tơl ală bơta kòn bơnus lơgar Việt Nam geh nùs nhơm niam, bồ tơngoh gĭt wă, niam chài, pràn kơl dang, nùs nhơm, pràn jak; tơnguh uă bơta pràn jak dà đơs lơgar bơdìh, tàm hơ̆ uă ngan là dà Mỹ tàm ală hìu bơsram. Thủ tướng ồng Phạm Minh Chính sồr Ƀộ Bơto bơtê mờ Bơsram iăt jơnau đơs tă pơgồp tàm dar pơrjum, lơh gơs jơnau dan ai lơh jăt Broă lơh Jơnau kờñ dà lơgar bè lơh pa jơh, tơnguh uă bơta niam tàm bơto bơsram. Broă lơh ai jơnau kờñ pal rơhời bơto uă dà Mỹ tàm bơto kấp dùl mờ bơto bơtê pe kâp. Bơto kòn bơnus den pal tơrgùm tàm nùs nhơm, bơta gĭt wă, pràn kơl dang, niam chài. Nùs nhơm niam, bơta gĭt wă den neh đơs uă mơya pràn kơl dang, niam chài tàm tơngai do ờ hềt sền gròi uă. Mơkung sền gròi tus ală kơnòm dềt tàm tiahsar tiah ngài, tiah nhàr lơgar, tiah bồt bơlào dà lềng.