Jăt jơnau yal, di tàm dơ̆ tơnkah ngai 30 nhai 4 nam do rơ̆p ai rơndeh lòt là 228 kơi sồ gùng rơndeh lòt mhar; bè hơ̆, tàm gùt lơgar rơ̆p geh 2 rơbô 250 kơi sồ gùng rơndeh lòt mhar neh lơh gơs; tus lồi nam rơ̆p geh 2 rơbô 920 kơi sồ gùng.

Di lah lơh gơs tai ală gơl gùng tàm ală tiah den rơ̆p geh di pơgăp 3 rơbô 210 kơi sồ. bơdìh hơ̆ tai, gam gơl gùng Đồng Đăng - Trà Lĩnh mờ Hữu Nghị - Chi Lăng di lah lơh gơs tơn tàm nam 2025 do den kờp jơh khà kơi sồ gùng rơndeh lòt mhar geh bơh đah Tô tus đah Jum là 3 rơbô 345 kơi sồ. Thủ tướng sồr ling klàng, kwang àng sền wơl broă lơh tàm ală gơl gùng rơndeh lòt mhar, tàm hơ̆ uă ngan là gơl gùng rơndeh lòt mhar Lạng Sơn - Cao Bằng. Thủ tướng đơs tờm di lah lơh mhar tŭ tơngai, sền wơl broă lơh mờ jơh ală cau tờm gơrềng bal tus bal lơh den ờ mìng 3 rơbô kơi sồ mờ di gơlan lơh geh tus 3 rơbô 300 kơi sồ, sơrlèt 10% pơn drờm mờ jơnau neh geh ai.