Thủ tướng sồr tàm ngai 11/04 ai dùl mpồl tam bơyai bơh Ƀộ trưởng Ƀộ Lơh sa mờ măy mŏk mờ Kă bro phan lơh lam bồ mpồl mờ mpồl cau mờng chài broă lơh, geh broă rơndăp lơh drơng wơl tàm nùs nhơm “bơta kwơ bơnĕ bơnài bal, rềs àr àñ ơnòng bal”. Thủ tướng đơs niam ngan bơta lơh wơl mhar, di tŭ bơh ală ƀộ, gah dê tàm tơngai do. Ồng pà gĭt, tơnơ̆ lơgar Ñờk mờ Hàn Quốc, lơgar Mỹ neh hơ yal bơr tàm bơyai mờ lơgar Việt Nam nàng kờñ tàm pơnring kă bro phan kơ̆ kơl jăp jŏ jòng. Bè pơlam gùng, Thủ tướng đơs sùm, jơnau kờñ kơ̆ kơl jăp bơta tàm lơgar, gàr niam lơngăp lơngai – cíñ trị - rơndăp tăp sèng mpồl bơtiàn, iang nùs làng bol mờ cau bơcri priă, mơkung pơn jăt tai gàr sùm kơ̆ kơl jăp lơh sa dờng, gơguh lơh sa, gròi sền roh giă priă mờ tàm pơnring kes priă.

Thủ tướng đơs là do là tŭ jiơ niam nàng rơndăp tăp sèng wơl rài lơh sa jăt gùng tơlir, tàm pơdar, chồl tơngguh tam gơl pa bơceh lơh, lơh rơ̆ ru drà kă bro mờ ală anih tăc phan. Thủ tướng kung sồr lơh mhar ai priă bơcri dà lơgar, ờ sa mờ tơrmù dia, priă pal tă mờ rơcăng bơnah priă càn 500 rbô tơmàn đong nàng gơhòi gơ jà ngui sa, dong kờl mpồl lơh sa kă bro.