Nàng kờñ tơngguh gĭt gơ̆p lơh broă bal đah Việt Nam mờ OECD ngai sơlơ ngan ngồn, cồng nha rlau, Thủ tướng yal Việt Nam kờñ kơlôi sơnơng mŭt bal tàm OECD mờ sồr Ồng Kwang Gơnoar cih dờng sồr ală Mpồl lơh broă ờs mờng bơh OECD dê tam pà bal bơta mờng chài, bơto pơlam broă lơh mờ dong kờl lơgar Việt Nam tơngguh uă pràn jak tàm pơrlòng, wèt tus broă lơh geh tơl ală jơnau sồr dipal ătbồ broă gùt plai ù bơh OECD dê; dong kờl lơgar Việt Nam lơh sir mờ yal ală jơnau yal lơh sa kwơmàng nàng lơh bơnàng jă đòm jăt geh kwơ ai broă rơndăp gùng dà ală broă lơh bơtàu tơngguh jŏ tơngai bơh Việt Nam dê.

Thủ tướng sồr OECD dồ nùs bal, dong kờl nàng lơgar Việt Nam lơh geh ală jơnau sồr, broă rơndăp, wèt tus broă mŭt bal tàm OECD, bơh hơ̆ pơn jăt tai mŭt gơrờm bal jrô rlau tàm lơh sa dunia mờ tă pơgồp uă rlau ai mpồl bơtiàn ală lơgar in, tài ring lơngai, lơh broă bal mờ bơtàu tơngguh tàm dunia.