Tàm dơ̆ wă ồng Khuất Đông Ngọc, Kwang Lam bồ dờng Mpồl Broă lơh sa suơn sre mờ Phan sa geh gar Liên hợp quôk (FAO), Thủ tướng ồng Phạm Minh Chính đơs nền Việt Nam jờng rơ uă ngan bơta gĭt gơ̆p lơh broă bal mờ FAO tàm ală nam pa do, ngan là tàm sơlơ tơnguh tai bơtàu tơnguh broă lơh sa suơn sre, ƀòn lơgar mờ tam gơl ală broă lơh phan sa geh gar, phan ngui sa kơ̆ kơl jăp jŏ jòng tàm lơgar Việt Nam. Tus tŭ do Việt Nam neh geh uă tă pơgồp kwơ màng ai gàr tơl phan sa geh gar dunia dê, is ồn là sơlơ tơnguh tai tăc mờ lơgar ndai tŭ bàr pe lơgar ờ hoan ai tăc phe mờ lơgar ndai tài bơh kal ke ală anih tăc phe tàm tơngai kòp dờng Kovid-19 dê.

Nàng sơlơ tơnguh tai lơh broă bal đah 2 gah, Thủ tướng sồr FAO pơn jat tai dong kờl, kờñ lơgar Việt Nam tàm tŭ rơndăp tăp sèng wơl gah broă lơh sa suơn sre jat gùng dà tơnguh uă bơta kwơ gơguh tai mờ bơtàu tơnguh tơlir, kơ̆ kơl jăp, ngăc ngar, rcang lài pleh mờ tam gơl nhơm trồ tiah; lơh sa mờ măi mok lơm, lơh tiah drà ƀòn lơgar, bơtàu tơnguh ƀòn lơgar tơlir, sàng goh, niam bơnĕ; lơh pràn tam gơl sồ.