Tàm dơ̆ wă, Thủ tướng ồng Phạm Minh Chính đơs nền, Việt Nam sùm sền dờng màng bơta git gơp lơh bơyô ờs mờng niam bơnĕ mờ lơgar Thụy Điển. Thủ tướng jờng rơ Tập đoàn SYRE kờp dŭ lài bơcri priă mpồl lơh wơl biài polyester tàm Bình Định mờ bơta pràn bơceh lơh gơguh tus 250 rbô tấn pah nam, jat gùng dà lơh sa tơlir, sàng goh, ngui phan sang gơ rềng tus tàñ mai, pơgồp bơnah lơh niam tiah ơm kis jat jơnau đơs bơh ală pơrjum bơh COP26 tus 28. Thủ tướng đơs nền, Việt Nam gam tơrgùm bơtàu tơnguh lơh sa tàm pơdar, tam gơl năng lượng tơlir, đal git do là dùl tàm ală bơta gơn kơnờm pa ai gơguh lơh sa tơlir mờ kơ̆ kơljap in, lơh geh khà gơguh GDP bơh 8% tàm nam 2025 mờ 2 nơm sồ tàm ală nam tus.