Di dơ̆ tơngkah kir sơnrai 94 nam ngai tơnggơs Đoàn Ơruh pơnu Kộng sản Hồ Chí Minh Dà lơgar (26/03), Thủ tướng ồng Phạm Minh Chính pa geh dơ̆ tìp mat, tơm bơh bơr mờ ơruh pơnu mờ tơngume “Ơruh pơnu Việt Nam lam lài bơtàu tơnguh jak chài măi mok, tam gơl pa bơceh lơh mờ tam gơl sồ Dà lơgar”.

Tàm dơ̆ tơm bơh bơr, Thủ tướng ồng Phạm Minh Chính mờ kwang đơng lam bồ ală Ƀộ, gah broă neh hơ tơn ală jơnau lùp bơh ơruh pơnu dê bè uă gah kwơ màng, geh: sơnđờm mut lơh broă bơceh lơh; bơtàu tơnguh jak chài bơh sơn rờp; bơtàu tơnguh mpồl lơh broă jak uă, is ồn tàm ală gah măi mok, broă lơh gơ hòi gơ jà mờ gàr cau jak chài ơm lơh broă. Thủ tướng sồr Ơruh pơnu Việt Nam lơh jat niam nùs nhơm lam lài, bơceh lơh mờ “5 rcang lài” tàm bơtàu tơnguh jak chài măi mok, tam gơl pa bơceh lơh mờ tam gơl sồ Dà lơgar; Rcang lài tàm bơsram sră, kơlôi sơnơng jak chài, ngui măi mok, tam gơl sồ; Rcang lài tus bal lơh sir kơrnoat boh lam, lơh niam tiah bơcri priă lơh sa kă bro; Rcang lài tàm atbồ ngăc ngar mờ lơh geh cồng nha lơh broă uă ngan; Rcang lài tàm sơnđờm mut lơh broă, tam gơl pa, bơceh lơh, tam gơl sồ; Rcang lài tàm tìp mat lơh kwèng, mut gơrờm bal ală lơgar.