Bơh ngai 05 nhai 6 tus tŭ do, mpồl ling klàng càr Quảng Ngãi neh tờ uă nhàr jòi sền tàm tiah Ƀlàng tơ̆p ƀồc cau ling chơ̆t màng sơnah ƀòn Đăk Cấm mờ jat kềng gah gùng Trường Chinh nàng jòi ƀồc ntìng cau ling chơ̆t màng. Mpồl cau geh gơnoar hòi jà 3 nơm rơndeh chŏ ù, rơndeh pơndiang, 3 nơm rơndeh rada sền tàm dơlam ù bal mờ uă rơndeh rơndồ, măi mok drơng broă lơh lòt jòi.

Drim ngai 29 nhai 6, mpồl lơh broă geh gơnoar neh sền gŏ, tờ 1 ƀồc ntìng cau ling chơ̆t màng mờ jun rê tàm hìu sền gàr ƀlàng tơ̆p ƀồc nàng duh khoai, chu ñàng. Tus tơn tàm tiah jòi, Thượng tướng ồng Lê Quang Minh sồr mpồl cau lơh kơnòl broă pơn jat tai kờp sền, jòi sền dùl bă jak chài, nền nòn, ờ gŏ di lời hŭi khat dùl tềl lời wơl lơi mờ gàr niam lơngăp lơngai ai kwang bàng, cau ling in tàm tŭ lòt jòi.