Tàm ngai lồi sơnam do, jơh hìu bơnhă bi Thị Nguyệt, kòn cau M’nông, ơm tàm ƀòn Bu Prăng 1A, sàh Quảng Trực, kơnhoàl Tuy Đức, càr Dăk Nông neh bơtòm tơrgùm rcang wă rò sơnam pa. Nam pa do là dùl nam lơh geh cồng nha  dờng tŭ rlau 1 lồ kơphê tam tàm bơrlŭ bal mờ tờm mắc ca cèng wơl priă lơh geh pơgăp 400 tơlak đong. Priă lơh geh gơguh uă, geh priă jền den hìu bơnhă bi kung blơi phan sa tềp tơl làm rlau, crăp rcang nàng wă rò làng bol tàm ƀòn, jơi nòi tus chờ hờp bal, nàng nam pa tus rơ̆p wơl pơn jat tai lơh ngan lơh sa: “Nam do giă kơphê gơguh uă, priă lơh geh gơguh uă rlau sơl, làng bol tam kơphê bè bol añ chờ hờp, wă rò sơnam pa kung tơl làm rlau. Nam pa tus, làng bol rơ̆p pơn jat tai lơh ngan sơng ka sền gàr nàng suơn chi in gơs niam, kơ̆p kờñ geh tai dùl kàl tam kơphê geh cồng nha dờng”.

Ồng Điểu Khanh, Ƀí thư Ci ƀộ ƀòn Bu Krắc, sàh Quảng Trực pà gĭt, tàm ală dơ̆ tam lơh, tiah sàh Quảng Trực gơtìp bol sò tơm đùh ƀồm mờ tam lơh cui rơcai ngan, mơya làng bol kung gam gàr ù, gàr ƀòn, dùl nùs lòt jat kăc màng. Dà lơgar tơrgùm dùl, tam gơl pa mờ tŭ do ƀòn lơgar neh geh ală tam gơl chờ hờp uă ngan. Is ồn, ală ƀòn lơgar tàm tiah nhàr lơgar neh geh ală bơnàng jă kơ̆ kơl jăp nàng bơtàu tơnguh tŭ geh Đảng, Dà lơgar sền gròi bơcri priă lơh dồ ròt bal ală phan bơna bơt bơtàu, mờ bàr pe nam pa do lơh broă sa suơn sre geh uă ngan bơta ƀuơn, giă phan lơh geh bơh broă lơh sa suơn sre gơguh uă. Wă rò sơnam pa, làng bol gam brơn brài, mờ bơta dòn kơ̆ bè dùl nam lơh geh cồng nha uă:“Ƀòn lơgar neh geh tam gơl chờ hờp uă ngan, làng bol brơn brài ngan wă rò sơnam pa. Làng bol rơ̆p pơn jat tai lơh ngan lơh sa, bơtàu tơnguh lơh sa, tam klăc bal, dồ nùs bal bơt bơtàu ƀòn lơgar, Dà lơgar ngai sơlơ pas niam”.

 Là sàh tiah nhàr lơgar ngài ngan rlau jơh càr Dăk Nông dê, Quảng Trực tŭ do geh mờr 3 rbô hìu bơnhă, rlau 10 rơbô nă cau, tàm hơ̆ rlau nggùl là làng bol jơi bơtiàn dồ ết nă cau. Jat ồng Đoàn Minh Thuận, Củ tịc Anih duh broă Làng bol sàh Quảng Trực, lơh geh cồng nha ngan rlau jơh bơh sàh dê tàm nam pa do là gơrmù tus 15% khà hìu bơnhă rƀah, gơ jat bal khà hìu bơnhă rƀah bơh sàh dê gơmù gam hơđơm 35%, sơrlèt uă broă jàu kấp càr mờ kấp kơnhoàl dê jàu. Bal mờ cồng nha bơh 3 broă lơh jơnau kờñ Dà lơgar bơcri priă ai sàh in den do là cồng nha lơh jat niam ngan bơta pràn tàm dơlam is, ai broă lơh sa suơn sre lơh bơnàng jă, bơtàu tơnguh ală bơta phan tam di pal mờ nhơm trồ tiah, ù tiah, cèng wơl cồng nha uă. Ồng Đoàn Minh Thuận, đơs: “Sàh kung geh pơlam gùng dà hơ̆ là broă tam gơl bơta gĭt wă mờ broă lơh mblàng yal, hòi jà mơkung lơh gơ rề uă ală broă lơh geh cồng nha uă, ai làng bol lùp bơsram bơh hơ̆ làng bol rê lơh ngan bơtàu tơnguh lơh sa hìu bơnhă. Bơdìh hơ̆, bol añ kung tơlik mat ală mpồl dong kờl pơlam lơh broă sa kấp ƀòn lơgar, tus tơn dong kờl làng bol in bơta chài tam phan, dong kờl tăc bro phan. Hơ̆ là dùl tàm ală broă dong làng bol tam gơl bồ tơngoh kơlôi sơnơng mờ lơh tờm, lơh is, pràn is nàng bơtàu tơnguh lơh sa”.

Ồng Nguyễn Văn Anh, Phó Củ tịc Anih duh broă Làng bol kơnhoàl Tuy Đức, càr Dăk Nông đơs, nam 2024 là dùl nam lơh geh uă cồng nha dờng tàm tơl gah broă. Rề dia sơrlèt 20%, tơrmù rƀah mờr 10% là ală khà sồ niam ngan tŭ jơh bal 14 broă jàu lơh sa mpồl bơtiàn bơh kơnhoàl dê ndrờm lơh geh mờ sơr lèt broă rơndăp lơh càr dê jàu. Jat ồng Nguyễn Văn Anh, kơnhoàl rƀah 30a Tuy Đức gam lòt ală cơnđoà kơ̆ kơl jăp nàng lơh tus lik klàs kơnhoàl rƀah tàm nam 2025, bal mờ Dà lơgar kơ̆ kơl jăp mut tàm rài pa, rài brồ să bơh jơi bơtiàn dê. Ồng Nguyễn Văn Anh, đơs: “Tiah do pơn jat tai bơsram lơh jat jrô ơnàng làm uă Jơnau lơh nền tàm pơrjum dờng Đảng ală kấp dê, jat tàm ală bơta hơ̆ lam lơh dồ ròt bal ală broă lơh, broă rơndăp lơh, rơndăp broă lơh bơcri priă mờ pơn jat tai mblàng yal, hòi jà làng bol jơh nùs lơh broă lơh sa, tơn jơh jơgloh tơrmù rƀah. Jơh nùs bơt bơtàu kơnhoàl Tuy Đức gơ gơs kơnhoàl bơtàu tơnguh, lik klàs rƀah tàm nam 2025”.

Mờ bơnàng jă lơh sa geh bơt bơtàu kơ̆ kơl jăp, kơnhoàl tiah nhàr lơgar Tuy Đức gam dòn kơ̆ cơnđoà mut tàm nam pa Ất Tỵ 2025 rơ̆p lik klàs rƀah mờ gơ gơs kơnhoàl bơtàu tơnguh bơh càr Dăk Nông dê. Làng bol tàm ală ƀòn lơgar kơnhoàl dê gam hô hơng chờ hờp wă rò nam pa, wă rò Sa tềp mờ pin dờn tàm nam pa lơh geh cồng nha dờng, bal mờ Dà lơgar cơnđoà kơ̆ mut tàm rài pa, rài brồ să bơh jơi bơtiàn dê.