Jơnau yal do geh yal tàm pơrjum tơn jơh 10 nam lơh jăt Jơnau sồr sồ 05 Ƀộ Cíñ trị dê mờ tơn jơh broă lơh sền swì, jăt sền, lơh glài đảng tơngai lơh broă bơh nam 2020- 2025 bơh Tỉñ ủy càr Lâm Đồng dê bơyai lơh. Bal mờ nùs nhơm ờ geh “tiah kơryan”, ờ geh ơm bơdìh, tơngai lơh broă bơh nam 2020- 2025, Tỉñ ủy, Mpồl Lơh kơnòl broă sùm Tỉñ ủy càr, kâp ủy, anih duh broă sền swì ală kâp càr Lâm Đồng dê neh tơrgùm đơng lam, sồr lơh mờ lam lơh jăt kràñ cê jơh nùs broă lơh sền swì, jăt sền mờ lơh glài Đảng dê. Broă bơsong kràñ cê jơh nùs ală đảng viên lơh tìs neh cèng wơl cồng nha uă tàm broă lơh bơto bơtê, kơryan lài lơh tìs bơh mpồl đảng, mờ kwang bàng, đảng viên dê.

Bulah bè hơ̆, ồng Y Thanh Hà Niê Kdam, Ƀí thư Tỉñ ủy càr Lâm Đồng đơs là, bàr pe dơ̆ sền swì, jăt sền gam lơh đah bơdìh lơm, lơh jăt bơta ờ bơtàu tơngguh; jơnau đơs pơndŭt sền swì, jăt sền gam bal bal lơm, ờ ai git geh ală bơta ờ hềt dipal, bơta ờ hềt wil tơl, lơh tìs nàng bơsong, lơh niam wơl, gơlam tus lơh jăt gơtùi mờ cồng nha lơh geh ờ hềt uă; Gơ sồr ală kâp ủy, mpồl đảng pal ai jơnau mờng chài ngan ngồn, mhar ai geh ală broă lơh bơsong tàm tơngai tus.