Broă lơh geh lam lơh tus jơh ală kấp Đoàn, tơrgùm tàm ală tiah pơrlòng mờ bơta tus bal bơh gĭt nđờ rơbô nă đoàn viên, ơruh pơnu. Tàm hơ̆, mpồl Đoàn ală hìu bơsram Đại họk, kao đẳng tơnggơs 12 mpồl dong kờl is mờ rlau 300 nă ơruh pơnu; mpồl Đoàn hìu bơsram kấp pe mờ Đoàn ală sàh, sơnah ƀòn, tiah is ồn gàr niam 273 mpồl dong kờl kơnòm pơrlòng.

Tềng đăp dơ̆ pơrlòng, ală mpồl neh lơh pràn broă lơh mblàng yal jơnau “Kàl pơrlòng gơ boh gơbài”, hòi jà priă jền jàu priă bơsram “Dong kờl kàl pơrlòng”, dong kờl bơsram wơl jơnau bơsram, bơto pơlam broă lơh mờ bơto pơlam nùs nhơm ai kơnòm bơsram in. Broă lơh pơgồp bơnah lơh geh ală bơta ƀuơn ngan, dong cau pơrlòng in iang nùs, pin dờn cơnđoà mut tàm dơ̆ pơrlòng kwơ màng.