Dờp jơnau jà bơh Tổng Ƀí thư Mpồl duh broă Đảng Kộng sản Dà lơgar Việt Nam ồng Tô Lâm, Củ tịc lơgar Việt Nam ồng Lương Cường, ngai do (14/4), Tổng Ƀí thư Mpồl duh broă Đảng Kộng sản Dà lơgar Lo, Củ tịc lơgar Lo ồng Tập Cận Bình sơn đờm dơ̆ lòt còp kâp dà lơgar tus lơgar he tàm 2 ngai nàng kờñ pơn jat tai gàr kơ̆ nùs nhơm lơh bơyô ờs mờng “ờ mìng là cau ling bal, mờ gam là oh mi tờm” đah Lo mờ Việt Nam mờ sơlơ tơnguh bơta tàm pin dờn jŏ jòng bal mờ gơp, lơh niam rlau bơta lơh broă bal ngan ngồn, lơh geh bơt bơtàu mpồl bơtiàn tam pà bal tơnơ̆ do đah Việt Nam mờ Lo tàm jơh ală bơta mờ ngan ngồn.

Do là dơ̆ lòt còp lơgar ndai sơn rờp tàm nam 2025, dơ̆ lòt còp lơgar Việt Nam dơ̆ 4 bơh ồng Tập Cận Bình dê tàm gơnoar broă đơng lam bồ dờng ngan rlau jơh bơh lơgar Lo dê mờ là dơ̆ 2 tàm dùl tơngai lơh broă. Phó Thủ tướng, Ƀộ trưởng Ƀộ Cribơyai broă mờ lơgar ndai ồng Bùi Thanh Sơn pà git, kờp dŭ tàm tơngai ơm còp, Tổng Ƀí thư, Củ tịc lơgar Lo ồng Tập Cận Bình geh ală dơ̆ pơrjum bơyai kâp dờng mờ Tổng Ƀí thư ồng Tô Lâm mờ Củ tịc lơgar ồng Lương Cường, dơ̆ dùl dơ̆ geh ală dơ̆ pơrjum mờ Thủ tướng Cíñ phủ ồng Phạm Minh Chính mờ Phó Củ tịc Quôk hội ồng Trần Thanh Mẫn nàng cribơyai bè ală broă lơh, gùng dà, broă rơndap lơh dờng nàng kờñ tơnguh bơta git gơp đah 2 lơgar tàm ală broă.