Tus bal geh Thủ tướng ồng Lê Minh Hưng, Củ tịc Quôk hội ồng Trần Thanh Mẫn mờ Duh broă sùm Mpồl đơng lam Đảng Dà lơgar ồng Trần Cẩm Tú. Dơ̆ tìp mat ai tơnggŏ bơta sền gròi bơh Đảng, Dà lơgar dê gơ wèt mờ làng bol ală jơi bơtiàn dồ êt nă cau, đơs nền gơnoar broă ngai sơlơ kuơmàng bơh mpồl cau ala mat Quôk hội là cau jơi bơtiàn dồ êt nă cau dê tàm ală anih lơh broă cíñ trị.

Tơm boh bơr đềt mềr mờ ală cau ala mat, Tổng Ƀí thư, Củ tịc lơgar ồng Tô Lâm đơs ngan, tơngai lài, broă lơh bơh Quôk hội dê bơh ală tơngai lơh broă pơn jat tai geh tam gơl pa jat gùng dà ngan ngồn rlau; broă lơh bơt bơtàu adat boh lam geh tơnguh bơta niam, jat sền ngai sơlơ tơl làm tàm jơh ală bơta, tàm hơ̆ mpồl cau ala mat Quôk hội là cau jơi bơtiàn dồ êt nă cau ngai sơlơ ai tơnggŏ loh làng gơnoar broă tàm bơt bơtàu gùng dà broă lơh, jat sền lam lơh jat ngan ngồn mờ tàm tơrbŏ bal đah Quôk hội mờ làng bol kòn cau. Nàng lơh jat jơnau sồr bơtàu tơnguh tàm tŭ tơngai pa, Tổng Ƀí thư, Củ tịc lơgar ồng Tô Lâm sồr, pơn jat tai tam gơl kuơmàng bồ tơngoh kơlôi sơnơng bè broă lơh jơi bơtiàn mờ gùng dà broă lơh jơi bơtiàn, bơta tờm ờ mìng là dong kờl, mờ gam tam gơl pràn gơ gơs lơh gơlik bơta niam nàng bơtàu tơnguh, jàu pà tŭ niam nàng làng bol in brồ guh. Jơnau kờñ ờ mìng ơm tàm broă tơrmù rƀah, mờ gam pal tơnguh priă lơh geh, tơnguh niam rài kis dồ bă kơnhăp jŏ, tơrmù lơyah bơta yah ngài bơtàu tơnguh mờ gàr bơta ring bal ngan ngồn. Tàm tŭ tơngai hơ̆, ală cau ala mat Quôk hội là cau jơi bơtiàn dồ êt nă cau kờñ pal rơcang lài yal ală bơta gơkòl bơh ƀòn lơgar, dan ală gùng dà broă lơh dipal rlau mờ bơta geh ngan bơh tơl ù tiah, tơl mpồl bơtiàn jơi bơtiàn dê. Tơl jơnau đơs, jơnau dan pal sơn đờm bơh bơta geh ngan, pơgồp bal mờ bơta gơtùi lam lơh ngan ngồn mờ wèt tus cồng nha ngan ngồn.