Jăt jơnau yal, nam 2024, kờp jơh phan bơna lơh geh GRDP càr Nam Định dê gơguh pơgăp 10% (rơndăp ơm dơ̆ 9 pơndrờm mờ jơh gùt lơgar). Rề dia dà lơgar geh 14 rbô 828 tơmàn đong, gơguh 42% pơndrờm mờ nam 2023. Đơs tàm dơ̆ lơh broă, Tổng Ƀí thư ồng Tô Lâm sồr, càr Nam Định pal pơn jăt tai lam lơh jăt gơtùi ală jơnau sồr, jơnau lơh nền tàm pơrjum bơh Dà lơgar dê. Mùl màl là lam lơh jăt kràñ cê jơh nùs Jơnau sồr sồ 35 bơh Ƀộ Cíñ trị dê bè Pơrjum dờng Đảng ală kâp wèt tus Pơrjum dờng Đảng gùt lơgar dơ̆ 14, do là kơnòl broă tờm ngan tàm nam do. Pơn jăt tai lơh jăt Jơnau lơh nền tàm pơrjum sồ 18 bơh Dà lơgar dê bè rơndăp tăp sèng tơrmù dipal mpồl lơh broă cíñ trị lơh broă geh cồng nha, lơh broă gơtùi mờ geh cồng nha, pơnđơl tàm nhai 2 sir nàng bơyai lơh Pơrjum dờng; nùs hơm là di tơl mơya pal drơng broă geh cồng nha ai ală rơnàng làng bol in.

Di dơ̆ rơcăng wă rò nam pa Sa tềp nam Ất Tỵ 2025, Tổng Ƀí thư ồng Tô Lâm nting bơr chờ gờm Đảng ƀộ, gơnoar ătbồ mờ làng bol càr Nam Định pơn jăt tai đòm jăt pràn kơldang bơhiàn kăc màng lơh jăt geh cồng nha ală jơnau kờñ, kơnòl broă neh sồr lơh.