Tàm dơ̆ lơh broă, bơh anih pờ tơlik tàm internet Hà Nội, Tổng Ƀí thư ồng Tô Lâm neh lùp còp, tơm bơh bơr rềp mềr pơndờm pơnđiang kwang bàng, cau ling Mpồl ling sền gàr tiah nhàr lơgar, ala mat kwang bàng, làng bol mờ mpồl ling phàu crong tàm ală tiah pờ tơlik tàm internet pôs đồng ling sền gàr tiah nhàr lơgar tàm bàr pe tiah. Đơs sùm, nam 2025, dùl nam bềng ală broă lơh tờm dờng màng, ală kơnòl broă jal mhar mờ bol he pal lơh sir nàng lơh geh bơnàng jă ai tơngai “bơtàu tơnguh” bơh jơi bơtiàn dê, ngan bè hơ̆ mpồl Ling sền gàr tiah nhàr lơgar kung pal “ntoăt mhar ngan” nàng lơh geh ală broă jàu, broă rơndăp lơh bơh nam lơh broă 2025 dê.

Di dơ̆ Sa tềp tus Nam pa rê, Tổng Ƀí thư sồr, bơsram, lam lơh jat niam Jơnau sồr bơh Ƀan Ƀí thư, bơh Thủ tướng Cíñ phủ mờ ală Jơnau sồr, broă rơndăp lơh bơh Ƀộ Ling klàng; bơyai lơh lòt sền, sền gròi, sŏk sền niam tiah nhàr lơgar, mpồng nhàr lơgar, gàr kơ̆ lơngăp lơngai cíñ trị, rơndăp tăp sèng lơngăp lơngai mpồl bơtiàn tàm tiah nhàr lơgar, mpồng nhàr lơgar tàm dơ̆ Sa tềp; gàr niam tơl làm jơnau sồr, broă lơh Sa tềp, bơyai lơh ai cau ling in wă rò Nam pa, chờ hờp Sa tềp hơn chờ, ram mhŭ, lơngăp lơngai, tềm pềr, sền gàr, sền gròi ai ală cau geh sră dong kờl Dà lơgar, hìu bơnhă rƀah tàm ù tiah nhàr lơgar, dà lềng, bồt bơlào dê.