Tổng Ƀí thư ồng Tô Lâm jờng rơ, cih dờp bơta tă pơgồp bơh làng bol ală jơi bơtiàn kơnhoàl Quản Bạ dê tàm broă lơh geh bal bơh càr dê, bơh dà lơgar dê. Tổng Ƀí thư ồng Tô Lâm pơlam gùng kâp ủy, gơnoar ătbồ mờ làng bol ală jơi bơtiàn kơnhoàl Quản Bạ pơn jăt tai đòm jăt bơhiàn tam klăc mờ ală cồng nha neh lơh geh, pal sơrlèt ală kal ke, ờ hềt dipal, bal mờ gơ̆p tơrgùm bal pràn, dồ nùs bal ai jơh pràn tàm pơrlòng jơh nùs lơh ngan lơh jăt geh cồng nha ală kơnòl broă bơtàu tơngguh lơh sa- mpồl bơtiàn, sền gàr niam dà lơgar- lơngăp lơngai, dipal mờ ù tiah là tiah nhàr lơgar, tiah cang gàr tiah nhàr lơgar đah Tô bơh Dà lơgar dê. Quản Bạ là kơnhoàl gùng mŭt bơh 4 kơnhoàl tiah jơnhoa, tiah nhàr lơgar đah Tô bơh càr Hà Giang dê, ơm tàm Sươn bal ù tiah gùt plai ù UNESCO Kơh bơnơm lŭ Đồng Văn.

Mang dồ ngai bal, Tổng Ƀí thư ồng Tô Lâm tus bal mờ hùc dà cê bal mờ gal ngan làng bol ală jơi bơtiàn tàm kơnhoàl mờ pà 30 bơnah phan pà ai ală hìu bơnhă dờp bơta dong kờl mpồl bơtiàn dê, hìu bơnhă cau geh màng mờ dà lơgar geh uă lơh ngan brồ guh tàm rài kis mờ sền dơ̆ lơh chờ Yàl ồs bơh làng bol kòn cau Pà Thẻn, càr Hà Giang dê.