Đơs pơndŭt dơ̆ lơh broă Tổng Ƀí thư ồng Tô Lâm sồr, jơh gùt Gah lơh sơnơm yờ tơnguh nùs nhơm niam lơh sơnơm tàm kwang bàng lơh sơnơm, bơdìh mờ lơh jat niam ngan ală jơnau bơto sồr bơh Wa Hồ dê gơwèt mờ kwang bàng gah lơh sơnơm den tơl nă cau lơh sơnơm, ƀák sìh, kwang bàng, cau lơh broă gah lơh sơnơm bơdìh mờ lơh niam ngan broă lơh ờs mờng den pal yờ tơnguh uă nùs nhơm sền dờng màng mờ sền gàr màng kis, pràn kơl dang să jan cau kòp in; tơm bơh bơr ring bal, ờ tam cah is “cau rềp mềl” mờ cau kòp; sền dờng màng gơnoar mờ nùs nhơm bơh cau kòp dê; jơh nùs dòn song, lơh jat di pal tàm tơl broă lơh lơh broă; sùm bơsram tàp nàng yờ tơnguh uă bơta gĭt wă, bơta chài lơh broă ờs mờng; tơngŏ geh kơnòl mờ mpồl bơtiàn, nàng ngan ngồn là “Mè lơbơn niam” tam măt cau kòp mờ hìu bơnhă cau kòp dê.

Bơdìh hơ̆, pơn jat tai lơh kơ̆ kơl jăp mờ tơnguh uă bơta niam ală anih lơh sơnơm ƀòn lơgar, tơnguh bơta niam phan bơna, măi mok mờ phan bơna bơt bơtàu ai hìu sơnơm kơnhoàl, hìu sơnơm sàh in; gàr niam lơh sơnơm ƀòn lơgar geh tơl ƀák sìh mờ cau lơh broă lơh sơnơm geh bơta gĭt wă, is ồn tàm tiah sar lơgar ngài; sùm lơh niam cồng nha drơng broă lơh sơnơm nàng gơ hòi gơ jà làng bol kham sơm kòp tàm ală tiah ala tài bơh tus uă ngan tàm hìu sơnơm kơnă hơđang.