Là càr tiah kơh bơnơm, tiah nhàr lơgar geh bă ù kwơ màng bè sền gàr dà lơgar, lơngăp lơngai mờ lơh broă bal mờ lơgar ndai, tàm bơta gam uă kal ke, mơya càr Hà Giang neh geh ală bơtàu tơnguh tơl ală bơta lơh sa mpồl bơtiàn, gàr niam dà lơgar, lơngăp lơngai, lơh ngan tơnguh rài kis làng bol ală jơi bơtiàn tàm tiah ngài, tiah gơtìp kal ke.

Tàm dơ̆ lơh broă, Tổng Ƀí thư ồng Tô Lâm ai tơngŏ loh ală bơta pràn bơh càr dê, sồr tàm tơngai tus càr tơrgùm bơtàu tơnguh lơh sa mpồl bơtiàn, lơh jăt ală bơta geh, lơh geh cồng nha ală bơta pràn, ai càr Hà Giang bơtàu tơnguh tơl ală bơta, lơh ngan pal ndrờm mờ khà bal gùt lơgar dê. Càr Hà Giang pal lơh ngan uă, lơh ngan pràn, ñhăp ñhar, bơceh lơh, tam gơl pa bơh càr dê, khin kơlôi, khin lơh, gơguh pràn kơl dang sră nggal bal mờ tiah bơcri priă kă bro, rơcang jòi geh gùng dà broă lơh ờ mìng kơ̆p tàm broă dong kờl bơh Dà lơgar dê.

Lài mờ hơ̆, Tổng Ƀí thư ồng Tô Lâm bal mờ mpồl kwang bàng lơh broă neh tus chu ñàng kah kơlôi Củ tịc Hồ Chí Minh tềng jơnang rùp Wa Hồ tàm ƀlàng hìu duh broă Tỉñ ủy càr Hà Giang.