Drim ngai 04/02 tàm Hìu duh broă Đảng Dà lơgar dê, Tổng Ƀí thư ồng Tô Lâm đơng lam dơ̆ pơrjum Mpồl Đơng lam Đảng Dà lơgar, sền wơl broă lam lơh jăt Jơnau sồr sồ 40 bơh Mpồl Đơng lam Đảng Dà lơgar dê bè broă bơyai lơh Sa tềp Ất Tỵ nam 2025; sồr lơh bàr pe kơnòl broă tờm bơh Dà lơgar dê, ală kâp ủy dê tàm tơngai tus. Jơnau đơs pơndŭt Pơrjum, Tổng Ƀí thư ồng Tô Lâm jờng rơ, đơs niam ngan ală kâp, ală gah, ală anih lơh broă, mpồl lơh broă, ƀòn lơgar neh mblàng yal, lam lơh jăt niam, geh cồng nha Jơnau sồr sồ 40 bè bơyai lơh Sa tềp bơhiàn jơi bơtiàn dê nam Ất Tỵ 2025.

Bè ală kơnòl broă tờm tơngai tus, sền bal ring bal mờ 09 mpồl kơnòl broă neh sồr lơh, ồng Tổng Ƀí thư đơs sùm, sồr ală anih lơh broă, mpồl lơh broă, ƀòn lơgar kŭp tê tơn tàm broă lơh tơnơ̆ ơm rlô Sa tềp, bañ lời gơlik jơnau Sa tềp jŏ jòng, ờ gŏ rơcăng broă lơh, tơrgùm lơh sir di tơngai ală broă lơh bơh nhai 02 nam 2025 mờ qúy I nam 2025 dê; bơyai lơh ală dơ̆ lơh chờ bồ nam pal niam lơngăp lơngai, tềm pềr, lơh glài kràñ ală broă lơh sơmờm, lơh gơbàn ờ niam. Rơcăng niam wil tơl ală tơngume dơ̆ pơrjum Quôk hội dê nhai 02 nam 2025, ngan là ală tơnggume gơrềng tus rơndăp tăp sèng rơndăp mpồl lơh broă mờ tă bơsong kal ke, gơkòl bè kơrnoăt boh lam. Jơh nùs lơh ngan kràñ cê jơh nùs ală jơnau sồr, broă lơh lơh jăt jơnau kờñ gơguh GDP rlau 8% tàm nam 2025, lơh geh bơnàng jă nàng gơguh 2 nơm khà tàm tơngai bơh nam 2026- 2030.