Đơs pơn dut tàm pơrjum, Tổng Ƀí thư ồng Tô Lâm đơs nền, Jơnau neh lơh nền bè rơndap broă ling klàng kâp hơ đơm “jak, tơl, pràn” lơh jat jơnau sồr kơnòl broă tàm bơta pa, di mờ ală broă rơndap lơh bè ling klàng, sền gàr dà lơgar mờ gùng dà ling klàng sền gàr dà lơgar. Kuơmàng, neh gàr ală jơnau pal jat Đảng đơng lam bồ Ling klàng làng bol Việt Nam tơl jơh ală bơta, đơng lam tơn bè tơl broă mờ tàm hơ̆ lơh sùm tơn là Ƀộ Cíñ trị, Mpồl đơng lam Đảng dà lơgar; đòm jat nùs nhơm mờ rơndap broă Ling klàng làng bol Việt Nam neh geh đơs tàm ală jơnau lơh nền tàm pơrjum, jơnau đơs pơn dut bơh Đảng dê; gàr ling klàng ngan ngồn là mpồl tờm sền gàr kơ̆ kơljap dà lơgar Việt Nam xã hội củ nghĩa .

Bơh cồng nha lam lơh jat ală jơnau lơh nền tàm pơrjum, jơnau đơs pơn dut bơh Ƀộ Cíñ trị dê, Tổng Ƀí thư sồr, pơn jat tai rơndap sap sèng ală mpồl ling klàng kâp hơ đơm, ling sền gàr dà lơgar jat gùng dà bơh Đảng, dà lơgar dê; gàr “ngac ngar, tơrmù lơyah, pràn kơldang” geh lam lơh jat geh cồng nha, tơrmù mpồl lơh kòn gùng, ngan ngồn là mpồl tờm tàm bơt bơtàu mờ lơh jat gùng dà sền gàr dà lơgar jơh gùt làng bol, tam lơh làng bol mờ sền gàr kơ̆ gơnoar tờm lơngăp lơngai tiah nhàr dà lơgar.