Đơs sồr lơh tàm pơrjum, Tổng Ƀí thư ồng Tô Lâm, Lam bồ Mpồl Sồr lơh Dà lơgar dê bè rơcăng dră wơl sa kwề sa kwà, pơhì pơhà, ờ niam đơs tàm nam 2024, broă lơh rơcăng dră sa kwề sa kwà, pơhì pơhà, ờ niam tàm jơh gùt Gah broă cíñ trị tàm dơlam Đảng mờ bơh ală Mpồl Sồr lơh kâp càr, ƀòn dờng dê pơn jăt tai geh lơh jăt di jơnau sồr, di pơlam gùng mờ nùs nhơm ờ geh tiah kơryan, ờ geh ơm bơdìh bulah cau hơ̆ là cau lơi, pơgồp bơnah lơh kơ̆ kơl jăp bơta pin dờn bơh làng bol dê mờ Đảng, geh gơ̆p bơyô mpồl bơtiàn ală lơgar đơs niam ngan.

Dồ nùs bal mờ ală kơnòl broă gùng dà broă lơh mờ jơh gùt Gah dê rơcăng lơh tàm nam 2025, Tổng Ƀí thư sồr, bơsong mơ tơn ală jơnau gam gơkòl ờ hềt dipal neh geh yal loh tàm jơnau yal mờ ală broă cribơyai tàm pơrjum. Đơs sùm nam tus rơ̆p geh lơh uă broă kwơmàng Dà lơgar, Đảng dê mờ Dà lơgar he geh uă ngan jơnau sồr mờ bồ tơngoh kơlôi sơnơng pa, jơnau sồr gơ tơlik uă ngan. Den tàng bè hơ̆, jơh gùt Gah broă cíñ trị tàm dơlam Đảng mờ ală Mpồl sồr lơh kâp càr, ƀòn dờng pal jăt rềp, gĭt loh nàng tă pơgồp jơnau đơs geh cồng nha mờ Đảng mờ Dà lơgar tàm broă lơh broă cíñ trị tàm dơlam.