Ala măt Đảng Dà lơgar, Tổng Ƀí thư yal bè bàr pe jơnau sồr jŏ jòng nàng kờñ lơh geh jơnau kờñ jơnhoa ngan “kơ̆ kơl jăp mpồl bơtiàn, bơtàu tơngguh lơh sa, bơtàu tơngguh uă rài kis cau làng bol in”, tus nam 2030, lơgar he gơgơs là lơgar gam bơtàu tơnguh geh rài lơh sa mờ măy mŏk pa ngan, tus nam 2045 gơgơs lơgar bơtàu tơngguh, geh priă lơh geh uă. Tổng Ƀí thư đơs nền, Đảng mờ Dà lơgar tơrgùm jơh nùs jơh pràn ală broă lơh bơsong gàr tiah ơm kis ring lơngai, kơ̆ kơl jăp nàng bơtàu tơngguh dà lơgar. Đảng he ờ geh bơta kwơ lơi ndai bơdìh mờ bơta kwơ bơh Làng bol dê; Làng bol là tờm ngan, cau tờm tàm tơl jơnau sồr, gùng dà bơh Đảng dê; jơh ală bơta pơnđơl bơh Đảng, Dà lơgar dê, jơh ală anih lơh broă cíñ trị mìng geh kwơ tŭ làng bol geh rài kis hờm ram, chờ hờp chờ hờn.

Ngan tài bè hơ̆, Đảng, Dà lơgar rơ̆p tơrgùm ală broă lơh bơsong trăng gàr, bơtàu tơngguh uă rài kis Làng bol dê, ngan là làng bol ală jơi bơtiàn dồ êt nă cau tàm tiah sar, tiah ngài, tiah nhàr lơgar, bồt bơlào dà lềng, tiah pôs đồng tam lơh mờ cau sò tơm yau, ală tiah dờng màng, tiah geh gal làng bol dòn jăt Yàng. Lơh jăt niam broă lơh dong kờl sền gàr lơngăp lơngai rài kis mpồl bơtiàn, bơta kwơ bal mpồl bơtiàn, broă lơh dong kờl gơ wèt mờ cau geh màng mờ kăc màng; lơh jăt broă lơh dong kờl ờ tă priă bơsram gơ wèt mờ jơh ală kâp bơsram pe kâp; jơh nùs lơh ngan lơh sir tơn jơh hìu ơm ồm sèt ñhăt dà mìu tàm jơh gùt lơgar; sền gròi bơtàu tơngguh lơh sơnơm, sền gàr pràn kơldang làng bol in, wèt tus ờ sa priă piam kòp tàm hìu sơnơm ai jơh tơl nă làng bol in, nàng tơl nă cau làng bol Việt Nam dê mùl màl geh rài kis hờm ram, chờ hờp chờ hờn.