Ala măt Đảng, Dà lơgar mờ Làng bol Việt Nam, Tổng Ƀí thư ồng Tô Lâm tơlik nùs nhơm jê sồt muăt jrùm ngan tềng đăp bơta sang rài bơh ồng Khamtay Siphandone dê mờ pơyua tus ală oh mi Đơng lam kâp dờng lơgar Lào dê, jơh ală làng bol Lào mờ hìu bơnhă ồng Khamtay Siphandone jơnau tam pà bal bơta muăt jrùm jrô ơnàng ngan rlau jơh. Tổng Ƀí thư ồng Tô Lâm đơs sùm, ồng Khamtay Siphandone ờ mìng là kwang Đơng lam jak chài ngan gĭt lơh gơ wèt rơnàng cau sơnrờp bơ̆t bơtàu kăc màng Lào, đơng lam dơ̆ kăc màng jơi bơtiàn làng bol lơh tờm lài do mờ broă lơh sền gàr mờ bơtàu tơnguh dà lơgar, cau Đơng lam lòt lài tàm broă lam lơh jăt gùng dà tam gơl pa tơl làm bơh Đảng Làng bol kăc màng Lào dê mờ gam là cau bơyô dòn song, tam klăc bal, cau oh mi đềt mềr, sùm ơm rềp bal mờ Việt Nam tàm jơh gơl gùng tam dră mờ bol sò tơm thàm phà nàng sền gàr Dà lơgar mờ bơ̆t bơtàu dà lơgar bơh bàr jơi bơtiàn dê.

Bơta sang rài bơh ồng dê là dùl bơta roh rui hoàc hươr dờng ngan gơ wèt mờ Đảng, Dà lơgar mờ Làng bol 2 lơgar Lào mờ Việt Nam. Nàng kah rơngal wơl bơta tă pơgồp bơh ồng Khamtay Siphandone dê ai bơta bơtàu tơngguh bơta gĭt gơ̆p đềt mềr, kơ̆ kơl jăp đah Việt Nam mờ Lào, Đảng, Dà lơgar Việt Nam lơh nền bơyai lơh dà lơgar ies ƀồc tàm 2 ngai, bơh ngai 04 mờ ngai 05 nhai 04 nam 2025.