Ala măt Ƀộ Cíñ trị, Mpồl Đơng lam Đảng Dà lơgar pà bơkàu nting bơr chờ hờp bal mờ Lam bồ pa Cơldŭ lơh broă Đảng Dà lơgar ồng Lê Hoài Trung in, Tổng Ƀí thư ồng Tô Lâm đơs loh, uă jơnau sồr kwơmàng bơh Đảng dê gơlik bơh bơta tă pơgồp jơnau đơs bơh Cơldŭ lơh broă Đảng Dà lơgar dê, is ồn tàm tơngai tŭ do jơh ală anih lơh broă cíñ trị gam lam lơh kràñ cê jơh nùs Jơnau đơs pơndŭt bơh Dà lơgar dê bè broă lơh jăt Jơnau lơh nền tàm pơrjum sồ 18 bè tơrmù dipal mpồl lơh broă cíñ trị lơh broă jak, lơh broă gơtùi, geh cồng nha, rơcăng lơh Pơrjum dờng Đảng ƀộ ală kâp wèt tus Pơrjum dờng Đảng gùt lơgar dơ̆ 14, tơngai tơnguh mhar tam gơl pràn bơh rài lơh sa dê, den tàng bè hơ̆ kơnòl broă bơh Cơldŭ lơh broă Đảng Dà lơgar dê là kwơmàng ngan.

Đơs dờp kơnòl broă, ồng Lê Hoài Trung hơ rơ̆p jơh nùs bơsram mờ kơlôi sơnơng ală broă pa, tơnguh uă pràn jak, lơh ngan tàm broă lơh, bal mờ đơng lam bồ Cơldŭ lơh broă gàr kơ̆ bơta tam klăc, ring bal, đòm jăt bơhiàn “Jơh nùs dòn song, tam klăc, bơceh lơh, jơh nùs jơh tồr, sir tơl, gàr kơ̆ bơta pal jăt lơh broă”, đòm jăt ală broă lơh geh mờ cồng nha mờ ală rơnàng đơng lam bồ pa jơh tơngai lơh broă neh bơ̆t mòn gơs.